पाथीभरा क्षेत्रमा निर्माणाधीन केबलकारको विरोध जनाउँदै आएको ‘नो केबलकार’ समूहलाई वार्ताका लागि सरकारी वार्ता टोलीले आइतबार औपचारिकपत्र पठाउने भएको छ । वार्ताका लागि सरकारले गठन गरेको टोलीका संयोजक गृहसहसचिव प्रेमप्रसाद भट्टराईका अनुसार आन्दोलनरत पक्षलाई आइतबार औपचारिकपत्र लेख्ने र सोमबार वार्ता गर्ने तयारी छ ।
- प्रेमप्रसाद भट्टराई, संयोजक, सरकारी वार्ता टोली
- सरकारी वार्ता टोलीका तर्फबाट बिहीबार आन्दोलनरत पक्षलाई वार्ताका लागि आह्वान गर्ने भनिएको थियो, तर संघीय सांसद र गृहमन्त्रीको छलफल अपडेटका आधारमा आन्दोलनरत पक्षलाई वार्ताका लागि पत्र पठाइने भएकाले ढिला भएको हो ।
सहसचिव भट्टराईले गृहमन्त्री रमेश लेखक र कोशी प्रदेशका जिल्लाबाट प्रतिनिधिसभामा प्रतिनिधित्व गर्ने सांसदबिच भएको छलफलको अपडेट लिएर सोही आधारमा आन्दोलनरत पक्षलाई वार्ताका लागि आह्वान गर्ने तयारी गरिएको जानकारी दिए । यसअघि सरकारी वार्ता टोलीका तर्फबाट बिहीबार आन्दोलनरत पक्षलाई वार्ताका लागि आह्वान गर्ने भनिएको थियो, तर संघीय सांसद र गृहमन्त्रीको छलफल अपडेटका आधारमा आन्दोलनरत पक्षलाई वार्ताका लागि पत्र पठाइने भएकाले ढिला भएको सहसचिव भट्टराईले जानकारी दिए ।
आन्दोलनरत पक्षले भने मन्त्रिस्तरीय वार्ता टोली गठन गर्नुपर्नेसहितका चारबुँदे सर्त अघि सारेको छ । उसले बिहीबार दिउँसो दोस्रो चरणको आन्दोलनका कार्यक्रम घोषणा गरेको थियो । घोषित आन्दोलनअनुसार उक्त समूहले शनिबार कोशी प्रदेश र मधेश प्रदेशभर प्रदर्शन र जुलुस निकालेको छ । ‘नो केबलकार’ पक्षधर एवं मुक्कुम्लुङ अभियन्ता राम मादेनले १८ फागुनमा ग्लोबल जुम बैठक गर्ने र त्यसको तीन दिनपछि काठमाडौंमा बृहत् जनप्रदर्शन र विरोध सभा गर्ने बताए । मादेनले केबलकार खारेजीबाहेक विकल्प नभएको, तर वार्ताको टेबलमा बसेपछि नै समस्या सुल्झाने विश्वास लिएको बताए ।
वार्तामा बस्नुअघि ‘नो केबलकार’ पक्षले विज्ञप्ति सार्वजनिक गर्दै पक्राउ परेका कार्यकर्ता रिहाइ, केबलकार निर्माण क्षेत्रबाट सुरक्षा फौज फिर्ता र केबलकार निर्माण बन्द गरी त्यहाँबाट निर्माण सामग्री र उपकरण तथा निर्माणमा खटिएका जनशक्ति फिर्ता हुनुपर्ने सर्त अघि सारेका छन् ।
