ड्युटीका प्रहरीमाथि कुटपिट गर्ने सत्तारुढ एमालेको विद्यार्थी संगठन अनेरास्ववियुका विद्यार्थी नेता दुई सातामै छुटेका छन् । अनेरास्ववियुका स्थायी कमिटी सदस्य कमलराज जोशी सोमबार १० हजार धरौटीमा छुटेका हुन् ।
जोशीलाई १ फागुनमा प्रहरीले पक्राउ गरेको थियो । उनीसहित पाँचविरुद्ध अभद्र व्यवहारको मुद्दा दायर भएको थियो । जिल्ला अदालत, काठमाडौंको आदेशले पाँचैजना धरौटीमा छुटेको जिल्ला प्रहरी परिसर, काठमाडौंका एसपी अपिलराज बोहराले बताए ।
पक्राउ परेकामध्ये रमेश फुलारा १५ हजार, दिनेश सिग्देल, गोपालबहादुर शाही, नवीनसिंह ऐर र दिनेश सिग्देल १०–१० हजार रुपैयाँ धरौटीमा छुटेका हुन् ।
गत २५ माघको राति उनीहरूले क्युआरटी ड्युटीमा रहेका प्रहरी वृत्त दरबारमार्गका हवल्दार जुगलाल घर्ती र प्रहरी जवान नगेन्द्रराज विष्टलाई ठमेलमा कुटपिट गरेका थिए । उनीहरूले प्रहरीको मोटरसाइकल लडाउनुका साथै हेलमेट र लौरो फालेका थिए । प्रहरीको बर्दीसमेत च्यातेका थिए ।
सुरुमा प्रहरीले जोशीलाई जोगाउने प्रयास गरे पनि पछि सर्वत्र प्रश्न उठेपछि उनलाई पनि एक सातापछि पक्राउ गरेको थियो । यस्तो मुद्दामा प्रहरीले २५ दिनसम्म थुनामा राखेर अनुसन्धान गर्न पाउनेमा दुई सातामै अनुसन्धान सकाएर मुद्दा दायर गरेको थियो । प्रहरीमाथि नै कुट्नेलाई छाड्नसमेत दबाब परेपछि यसरी छिटो मुद्दा बुझाइएको स्रोत बताउँछ ।
गुन्डागर्दीको आरोपमा पक्राउ परेका मुद्दा नचली छुटे
गुन्डागर्दीको आरोपमा प्रहरीले पक्राउ गरेका सातजना मुद्दा नचली छुटेका छन् । गत २३ माघमा काठमाडौं उपत्यका अपराध अनुसन्धान कार्यालयले सातजनालाई पक्राउ गरी कारबाहीका लागि काठमाडौं परिसर पठाएको थियो । तर, जिल्ला सरकारी वकिल कार्यालयले मुद्दा चलाउन नपर्ने निर्णय गरेपछि उनीहरू छुटेका छन् ।
धादिङ गल्छीका रोमन आले, तनहुँ भानुका मनोहर थापा मगर र गुणबहादुर गुरुङ, गोरखा आरुघाटका सुमन पराजुली र पदमबहादुर मगर, काभ्रेपलाञ्चोक रोशीका रोशन तामाङ र दोलखा वैतेश्वरका गोपाल मोक्तानलाई प्रहरीले पक्राउ गरेको थियो । तरबारले केक काटेको र त्यसम्बन्धी भिडियो टिकटकलगायत सामाजिक सञ्जालमा राखेर आतंक मच्चाएको आरोप उनीहरूमाथि थियो । तर, पुरानो भिडियो भएको भन्दै मुद्दा नचलाई उनीहरूलाई छाडिएको छ । यसले प्रहरी अनुसन्धानदेखि सरकारी वकिलको निर्णयसम्ममा प्रश्न उठेको छ ।
