तुवाचुङ-जायजुममा निर्माण गरिएको पदमार्ग पर्यटकका लागि आकर्षणको केन्द्र बनेको छ । हलेसी तुवाचुङ नगरपालिका– ७ मा रहेको किराँत ऐतिहासिक स्थल तुवाचुङ जायजुङमा कंक्रिट प्रयोग नगरी चुनासुकीको पर्खाल निर्माण पदमार्ग ७३० मिटर लामो छ ।
संस्कृति, पर्यटन तथा नागरिक उड्डयन मन्त्रालयको लगानीमा निर्माण सुरु गरिएको पदमार्गलाई हलेसी तुवाचुङ नगरपालिकाले ‘तुवाचुङ मिनी ग्रेटवाल’ नामकरण गरेको छ । किराँत समुदायको सभ्यताको उदगमस्थल मानिने तुवाचुङ–जायजङमा मिनी ग्रेटवाल नामको पदमार्ग निर्माण गरिएसँगै सुन्दर बन्दै गएको छ ।
तुवाचुङ मिनी ग्रेटवालमा चुना र इँटाको धुलोसँगै फ्लाई स्टोन जोडेर पर्खाल निर्माण गरिएको हलेसी तुवाचुङ नगरपालिकाका प्रवक्ता एवं वडा नं. ७ महादेवस्थानका वडाध्यक्ष कमल गिरीले जानकारी दिए । ‘उकालो र उरालो भू-भागमा सोही सामग्री प्रयोग गरेर सिँढी निर्माण गरिएको छ । समथर स्थानमा घाँस पलाउने गरी ढुंगा र माटो मिलाइएको छ,’ उनले भने, ‘पदमार्गमा दुई मिटर चौडाइको पर्खाल निर्माण गरिएको छ । किराँत ऐतिहासिक स्थल तुवाचुङ जायजुममा निर्माणाधीन पदमार्ग आन्तरिक तथा बाह्य पर्यटकको रोजाइमा पर्न थालेको छ ।’
समुद्री सतहदेखि एक हजार आठ सय मिटर उचाइमा रहेको तुवाचुङ–जायजुम भौगोलिक हिसाबले अत्यन्तै आकर्षक छ । यहाँबाट सूर्योदय र सूर्यास्तको दृश्य देखिन्छ । आकाश खुलेका दिन उत्तरतिर पर्ने विश्वको सर्वोच्च शिखर सगरमाथाका साथै उच्च हिमाली शृंखलाहरू टलक्क चाँदीझैँ टल्किएको देखिन्छ । हिमाल, पहाड र तराईसम्मको दृश्य अवलोकन गर्न सकिने यस ऐतिहासिक एवं पर्यटकीय स्थलमा निर्माणाधीन मिनी ग्रेटवालले थप आकर्षक बढाएको हो ।
तयामा र खियामाले तान बुनेको यो ऐतिहासिक स्थलमा अहिले पनि दुईवटा तान बुनेको ढुंगाको दोखाम (तान) प्रत्यक्ष रूपमा देख्न सकिन्छ । किराँत मुन्दुमी मिथकअनुसार, तुवाचुङ जायजुममा तयामा र खियामा (दिदीबहिनी)ले कपडा बुन्ने गर्दथे । उनीहरू कपडा सभ्यताका उद्यमी मानिन्छन् ।
तुवाचुङ जायजुममा किराँत आदिम पुर्खा रैछाकुले, तायामा र खियामाको पूर्णकदको प्रतिमा यसअघि नै स्थापना गरिएको छ । हिन्दु, बौद्ध र किराँत धर्मावलम्बीको संगमस्थल हलेसीभन्दा केही माथि पर्ने तुवाचुङ जायजुममा मिनी ग्रेटवालसँगै, मञ्जुश्री गुफा जाने पदमार्ग, बसाहागुफाअगाडि माङ्खिम घर निर्माणका लागि संघीय सरकारको लगानीमा रु. पाँच करोड ८२ लाखमा ठेक्का लागेको थियो ।
विश्वप्रसिद्ध त्रिधार्मिकस्थल हलेसी नजिकैपर्ने मञ्जुश्री पदमार्ग निर्माणसँगै तुवाचुङ मिनी ग्रेटवाल निर्माण भइसकेको छ । संयुक्त निर्माणको जिम्मा पाएको कर्णेल समृद्धि जेभीले हाल तुवाचुङ जायजुम प्रवेशद्वारमा रु. ६० लाख लगानीमा दुईतले (दुईपांग्रे सवारीसाधनलाई भुइँतलामा तथा चारपांग्रे सवारीसाधनलाई माथिल्लो तलामा राख्ने गरी) पार्किङ निर्माण गरिरहेको छ ।
तुवाचुङ जायजुम ऐतिहासिक स्थल भएकाले निर्माणाधीन तुवाचुङ मिनी ग्रेटवालमा सिमेन्टको कंक्रिट प्रयोग नगरिएको हलेसी तुवाचुङ नगरपालिकाकी नगरप्रमुख विमला राईले जानकारी दिइन् । ‘ऐतिहासिक स्थललाई थप व्यवस्थित र आकर्षित बनाएर पर्यटक भित्र्याउने योजनासहित तुवाचुङ मिनी ग्रेटवालको अवधारणा अघि सारिएको हो,’ उनले भनिन्, ‘आगामी दिनमा तयामा र खियामाले तान बुन्दै गरेको स्थानलाई भौतिकीकरण गर्ने, तान बुन्दै गरेको प्रतिमा राख्ने, पर्यटकका लागि चिया तथा कफी खाने पार्कघर निर्माण गर्ने योजना नगरपालिकाको छ । क्रमशः उक्त क्षेत्रमा किराँत समुदायको भान्छामा पाउने सबै खाद्यवस्तु उपलब्ध गराउने योजना छ ।’
तयामा र खियामाले तान बुन्दै गरेको प्रतिमा निर्माणका लागि रु. ३० लाख तथा गार्डेन (बगैँचा)सहितको किराँत सांस्कृतिक घर निर्माणका लागि रु. २५ लाख बजेट नगरपालिकाले विनियोजन गरेको छ । प्रतिमा र सांस्कृतिक घरसमेत यसै वर्षभित्र निर्माण गरिने नगरप्रमुख राईले जानकारी दिइन् ।
मध्यपहाडी लोकमार्गअन्तर्गत दिक्तेल–हलेसी सडकखण्डमा पर्ने तुवाचुङ जायजुममा उँधौली र उँभौलीका अवसरमा तीन चुलाको पूजा गर्दै बृहत् साकेला सिली प्रदर्शन गर्ने गरिएको छ । तुवाचुङ जायजुममा नेपालका सबै जिल्ला तथा छिमेकी देश सिक्किम, दार्जिलिङ, भुटानलगायत किराँत समुदाय आउने गरेका छन् ।
सरकारले निर्धारण गरेको एक सयवटा गन्तव्यअन्तर्गत मन्दुम ट्रेल (पदमार्ग)मा पर्ने तुवाचुङ जायजुममा किराँती सभ्यताको अध्ययन तथा अवलोकन गर्न आउनेको संख्या पनि बढ्दै गएको छ । बाह्रै महिना आन्तरिक तथा बाह्य पर्यटकको भिड लाग्ने तुवाचुङ जायजुमको जमिन भिरालो हुँदा विशेष गरी साकेला नाच्ने समयमा जोखिम हुने भएकाले ढुंगाको पर्खाल लगाएर पदमार्ग निर्माण गरिएको हो ।
