उज्ज्वल राईको एक मात्र गोलको सहयोगमा नेपाल पुलिस क्लबले मंगलबार आयोजक सहारा क्लब पोखरालाई १–० ले पराजित गर्दै २४औँ आहा रारा गोल्डकप फुटबल प्रतियोगिताको क्वार्टरफाइनलमा स्थान पक्का गरेको छ । पोखरा रंगशालामा भएको उद्घाटन खेलमा उज्ज्वलले खेलको ३६औँ मिनेटमा एक मात्र गोल गरेका थिए । उनकै गोलमा आयोजक सहारा स्तब्ध भयो ।
उज्ज्वलले कर्नरबाट आएको बललाई दोस्रो बारमा उत्कृष्ट गोल गरेका थिए । हारसँगै सहारा प्रतियोगिताबाट बाहिरिएको छ । अब पुलिसले २६ माघमा सेमिफाइनल प्रवेशको खेलमा ब्रिगेड ब्वाइज क्लब युकेसँग खेल्नेछ । पुलिस र सहाराबिचको पहिलो हाफ प्रतिस्पर्धात्मक बनेको थियो ।
सुरुमा पुलिसमाथि दबाब बनाएको सहारा फिनिसिङमा चुक्न पुग्यो । खेलको पाँचौँ मिनेटमा विलियम सेसेनोङको प्रहार पुलिस क्लबका गोलरक्षक शत्रुधन चौधरीले बचाए । खेलको १२औँ मिनेटमा सहाराका कप्तान सुशील लामाको प्रहार विफल भयो । खेलको १७औँ मिनेटमा पुलिसका विवेक पाण्डेको प्रहार पहिलो बारको नजिक हुँदै बाहिरिएको थियो ।
खेलको २१औँ मिनेटमा पुलिस क्लबका विवेकको फ्रिकिक प्रहार सहाराका गोलरक्षक सन्तोष महतले बचाए । खेलको ५६ मिनेटमा सहाराका कप्तान सुशीलको प्रहार पुलिसका गोलरक्षक चौधरीले पन्च गर्दै रोके । प्रतियोगितामा बुधबार पूर्वविजेता एपिएफले मच्छिन्द्र क्लबको सामना गर्नेछ ।
डिफेन्डर सनिश सम्मानित
प्रतियोगिताको उद्घाटनमा नेपाली राष्ट्रिय फुटबल टिमका डिफेन्डर सनिश श्रेष्ठलाई सर्वोत्कृष्ट राष्ट्रिय फुटबल खेलाडीबाट सम्मान गरिएको थियो । आयोजक क्लबले ०७४ सालदेखि सर्वोत्कृष्ट राष्ट्रिय फुटबल खेलाडीबाट एकजनालाई सम्मान गर्दै आइरहेको छ । यस वर्ष राष्ट्रिय टोलीसँगै मच्छिन्द्र क्लबका डिफेन्डर सनिशलाई ५० हजार पाँच सय रुपैयाँ प्रदान गर्दै आयोजकले सम्मान गरेको हो ।
