नेपाल आयल निगमको ५५औं वार्षिकोत्सवमा नायव कार्यकारी निर्देशक वीरेन्द्र गोइत सर्वोत्कृष्ट कर्मचारी सम्मानबाट पुरस्कृत भएका छन् । निगमका संस्थापक सुवर्ण विक्रम थापाको स्मृतिमा प्रत्येक वर्ष एक जना कर्मचारीलाई प्रदान गर्दै आएको पुरस्कार यसपटक नायव कार्यकारी निर्देशक गोइतलाई प्रदान गरिएको हो ।
शुक्रबार आयोजित वार्षिकोत्सव समारोहमा उद्योग बाणिज्य तथा आपूर्ती मन्त्री दामोदर भण्डारीले गोइतलाई पुरस्कृत गरेका हुन् । गोइत १ जेठ, ०५२ मा आयल निगम प्रवेश गरेका थिए । उनी नायव कार्यकारी निर्देशकको चार वर्षे कार्यकाल अवधिका कारण आगामी जेठमा अवकाश हुँदै छन् । गाेइतले ६ वर्षअघि निगम प्रवक्ताको जिम्मेवारीसमेत निर्वाह गरेका थिए ।
आयल निगमको सेवामा रहँदा कर्मचारीहरु पेट्रोलियम पदार्थको जोखिमका कारण विभिन्न रोगबाट दीर्घरोगी हुने गरेका छन् । गोइतलाई समेत २० वर्षअघि निगमको वीरगञ्ज कार्यालयमा रहँदा पेट्रोलियम पदार्थको संक्रमणका कारण शरीर भरी पानीको फोका आउने र छाला पाक्ने रोग लागेका थियो ।
उनी भारतका विभिन्न अस्पताल पुगेर उपचार गरेपछि निको भएका थिए । अहिले पनि बेलाबेला सो रोगले दुःख दिने गरेको गोइतले निकटस्थहरुलाई सुनाउने गरेका छन् । उनी भारतसँगको पेट्रोलियम व्यापारका लागि ‘नोगेसेसन’ गर्न निगम भित्र सबैभन्दा बढी खोजीको पात्र बनेका छन् ।
आयल निगमका संस्थापक सुवर्ण बिक्रम थापा सबैभन्दा लामो समय महाप्रबन्धकको जिम्मेवारीमा रहेर काम गरेका थिए । उनलाई सरकारले २६ पुस, ०२७ मा नियुक्ती गरेको थियो ।
त्यसपछि १३ बर्षसम्म निगमको नेतृत्व गरेर थापा २६ कात्तिक, ०४० मा बिदा भएका थिए । सबैभन्दा बढी योगदान गर्ने महाप्रबन्धक थापाको नाममा निगमले प्रत्येक वर्ष एक जनालाई सर्वोत्कृष्ट कर्मचारीको रुपमा पुरस्कृत गर्दै आएको छ ।
