प्यारापिट नभए पनि दर्शकहरू भुइँमै बसेर हेर्दै छन् क्रिकेट
पछिल्लो समय मधेश प्रदेशमा क्रिकेटको क्रेज बढ्दो छ । गत आइतबारदेखि जनकपुर र वीरगन्जमा जय ट्रफी दुईदिवसीय मेन्स एलिट कप २०८१ सुरु भएको छ । प्रतियोगितामा मधेशको टिमसँगै बागमती प्रदेश, नेपाल पुलिस र त्रिभुवन आर्मी क्लबले प्रतिस्पर्धा गरिरहेका छन् ।
प्रतियोगिता खेल्नका लागि राष्ट्रियस्तरका खेलाडी र हेर्नका लागि ठुलो संख्यामा दर्शक भेला भएका छन् । वीरगन्ज महानगरपालिका ८ निवासी सन्दीप बस्नेतले मधेश प्रदेशका आठवटै जिल्लामा क्रिकेटको आकर्षण बढेको बताए । ‘वीरगन्ज विगतदेखि नै राष्ट्रियस्तरको खेलाडी जन्माएको ठाउँ हो,’ उनले भने, ‘अहिले पनि यहाँका अधिकांश खेलाडी राष्ट्रिय टिममा खेलिरहेका छन् । तर, यहाँका जीर्ण पूर्वाधार बनाउन वा भौतिक संरचना नयाँ बनाउन सरकारले ध्यान दिएको देखिन्न ।’
भर्खरै सकिएको नेपाल प्रिमियर लिगले पनि यहाँ क्रिकेटको क्रेज बढाउन सहयोग गरेको स्थानीय सागर क्षेत्रीले बताए । मधेश प्रदेशको प्रतिनिधित्व गरेको जनकपुर बोल्ट्सले उक्त प्रतियोगिताको उपाधि जितेको थियो ।
नारायणी क्रिकेट मैदानमा सुधारिएको पिच, तर छैन प्यारापिट
वीरगन्जको नारायणी क्रिकेट मैदानको रेखदेखमा सरकारले पर्याप्त ध्यान दिएको देखिन्न । झन्डै २३ वर्षअगाडि १८ कट्ठा १५ धुर क्षेत्रफलमा सातवटा टर्फ विकेटसहित यो क्रिकेट मैदान निर्माण गरिएको थियो । सरकार र राष्ट्रिय खेलकुद परिषद्ले केही जग्गाधनीसँगको मुआब्जासम्बन्धी विवाद समाधान नगर्दा मैदानमा पूर्ण रूपमा तारजाली वा बाउन्ड्रिवाल लगाउनसमेत समस्या भएको क्रिकेट संघ पर्साका अध्यक्ष मनीष सिंहले बताए । अहिले जय ट्रफी मेन्स एलिट कपका लागि काम चलाउ रूपमा तारजाली लगाइएको छ । त्यस्तै, क्रिकेट पिचलाई पनि स्तरोन्नति गरेर अन्तर्राष्ट्रियस्तरको बनाइएको छ । वीरगन्जनिवासी राष्ट्रिय टिमका खेलाडी आरिफ सेखले अहिले ग्राउन्ड राम्रो अवस्थामा रहेको बताएका छन् । उनी पुलिस क्लबमा आबद्ध छन् । त्रिभुवन आर्मी क्लबका कप्तान विनोद भण्डारीले पनि विगतको दाँजोमा अहिले नारायणी रंगशालाको ग्राउन्ड राम्र्रो भएको अनुभव सुनाए ।
मधेश प्रदेशका ब्याटर मयन यादवले जनकपुरको ग्राउन्ड डे क्रिकेटका लागि राम्रो भएकाले खेलाडीहरूले राम्रो प्रदर्शन गरिरहेको बताए । नेपाल पुलिस क्लबका प्रशिक्षक मञ्जित श्रेष्ठले पनि वीरगन्जको नारायणी रंगशालाको पहिलेभन्दा पिच र ग्राउन्ड पनि राम्रो भएको बताए । उनले यहाँका स्थानीयहरूको पनि राम्रो साथ र सहयोग पाइरहेको अवस्था रहेको बताए ।
तर, दर्शकलाई भने यहाँ कुनै पनि सुविधा छैन । प्यारापिट भएकाले कोही दर्शक भुइँमै बसेर त कोही उभिएर खेल हेर्न बाध्य छन् । त्यस्तै, रामजानकी रंगशालामा पनि दर्शकका लागि कुनै सुविधा नरहेको स्थानीयहरूले बताएका छन् ।
राष्ट्रिय खेलकुद परिषद्ले क्रिकेट मैदानका लागि पाँच बिघा जग्गा छुट्याएको थियो । जसमध्ये करिब तीन बिघा मात्र उपयोगमा आएको छ । प्रदेशमन्त्रीलाई भेटेर नारायणी रंगशालाको संरक्षण र विकासका लागि पटक–पटक पहल गरेको संघका अध्यक्ष सिंहले बताए । उनका अनुसार यहाँ अहिले पनि दैनिक एक सयको हाराहारीमा स्थानीय खेलाडी अभ्यास गरिरहेका हुन्छन् ।
जनकपुर र वीरगन्जमा एकैपटक प्रतियोगिता जारी
निर्माणाधीन जनकपुरको रामजानकी मैदानमा र वीरगन्जको नारायणी रंगशालामा जय ट्रफी मेन्स एलिट कप एकैपटक सुरु भएको हो । आइतबार र सोमबार वीरगन्जमा त्रिभुवन आर्मी र नेपाल पुलिस क्लबिच प्रतिस्पर्धा भएको थियो । त्यस्तै, जनकपुरमा मधेश प्रदेश र बागमती प्रदेश भिडेका थिए । बुधबार र बिहीबार पनि नारायणी रंगशालामा मधेश प्रदेश र नेपाल पुलिस क्लबले प्रतिस्पर्धा गर्नेछन् । त्यस्तै, निर्माणाधीन रामजानकी रंगशालामा त्रिभुवन आर्मी क्लब र बागमती प्रदेशले प्रतिस्पर्धा गर्दै छन् ।
क्रिकेट विकासको विरासत
नेपाली क्रिकेटको विकासमा वीरगन्जको योगदान ठुलो रहेको पूर्वखेलाडीले बताउने गरेका छन् । नेपाली टोलीका पूर्वकप्तान तथा क्यानका सचिव पारस खड्काले क्रिकेटरका लागि वीरगन्ज उर्वरभूमि रहेको बताए । यहाँ खेल्दा सधैँ राम्रो साथ पाउने गरेको स्मरण पनि उनले गरे । नेपालमा पहिलोपटक रंगीन जर्सीको प्रयोग र खेलाडीलाई भत्ता दिने काम वीरगन्जकै नारायणी रंगशालाबाट सुरु भएको थियो । अक्टोबर २००८ मा व्यवसायी उपेन्द्र महतोको सहयोगमा आयोजना भएको सिनटेज एमएम कपमा पहिलोपटक रंगीन जर्सी प्रयोग र खेलाडीलाई भत्ता वितरण गरिएको वीरगन्जनिवासी क्रिकेटर हासिम अन्सारीले बताए । उनको करिअर पनि यहीँबाट सुरु भएको थियो । उक्त प्रतियोगितामा पारस खड्का, ज्ञानेन्द्र मल्ल, शरद भेस्वाकर, दीपेन्द्र चौधरीजस्ता स्टार खेलाडीले प्रतिस्पर्धा गरेको उनले स्मरण गरे ।
