ताप्लेजुङको हिमाली क्षेत्रका बासिन्दाहरूलाई नियमित खाद्यान्न जोहो गर्न तिब्बतको भर पर्नुपर्ने बाध्यता हटेको छ । हिमाली पर्यटकीय गाउँहरू ओलाङचुङगोला, याङमालगायतका बासिन्दा तिप्ताला नाका खुले पनि अहिले तिब्बतभन्दा जिल्ला सदरमुकाम फुङलिङबाट नै खाद्य सामग्री लाने गरेका छन् ।
यसअघि ती क्षेत्रका स्थानीयहरू तिब्बतको रिउमा गएर खाद्य सामग्री ल्याउन बाध्य थिए । फक्ताङलुङ गाउँपालिका– ७ ओलाङचुङगोलाका वडाध्यक्ष छेतेन शेर्पा भोटेले सकेसम्म आफ्नै देशबाट सामान आयात गरेर उपभोग गर्ने बताए ।
यसअघि नुन, तेललगायतका खाद्य सामग्री तिब्बतको रिउ बजारबाट ल्याउने ओलाङचुङगोला, याङमाका बासिन्दा अहिले सदरमुकाम फुङलिङबाट लगिरहेको अध्यक्ष शेर्पाले जानकारी दिए । उनले भने, ‘तिब्बतको मुख ताक्नुपर्ने बाध्यतामा रहेका ओलाङचुङगोला, याङमाका बासिन्दा अहिले सदरमुकाम फुङलिङबाट खाद्य सामग्री लगेर प्रयोग गर्न पाउँदा स्वाभिमानी भएको महसुस गरेका छन् ।’
भारत र चीनलाई जोड्ने नेपालकै छोटो विराटनगरको रानीबाट ताप्लेजुङ ओलाङचुङगोला हुँदै चीनको सिमाना टिप्ताला भन्ज्याङ जोड्ने सडक ओलाङचुङगोला पुगेपछि नेपालबाट खाद्य सामग्री ल्याउन सहज भएको उनी बताउँछन् । कोरोनाका वेला १६ चैत ०७७ मा बन्द भएको तिप्ताला नाका गत जेठदेखि खुला भएको छ । नाका खुलेसँगै स्थानीयले अहिले केही मात्रामा तिब्बतबाट खाद्य सामग्री ल्याए पनि धेरै सामग्री सदरमुकामबाट ल्याउने गरेको बताउँछन् ।
सदरमुकाम फुङलिङबाट ओलाङचुङगोला हुँदै द्विदेशीय सिमाना टिप्ताला भन्ज्याङ जोड्ने सडक पूर्ण रूपमा जोडिएपछि ओलाङचुङगोलावासीको दिनचर्या परिवर्तन भएको छ । पहिला खच्चडमा तीन–चार दिनमा मात्रै पुग्ने खाद्यान्न सामग्री अहिले एक दिनमा ढुवानी हुन थालेको छ । खच्चडमा लगिने सामग्री अहिले गाडीमा ढुवानी हुन थालेको छ ।
