एनसेल फाउन्डेसनले नेपाल प्रिमियर लिग (एनपिएल)का खेलमा हानिएका प्रत्येक चौकाबापत चारवटा शैक्षिक सामग्री वितरण गर्ने घोषणाअनुरूप २६ सयभन्दा बढी शैक्षिक सामग्री वितरण गर्ने भएको छ । सामग्री वितरण गर्न एनसेलले कर्मयोग फाउन्डेसनसँग सहकार्य गरेको छ ।
यी सामग्री ग्रामीण र दुर्गम क्षेत्रका सामुदायिक विद्यालयका विद्यार्थीलाई प्रदान गरिनेछन् । शनिबार सम्पन्न एनपिएलमा कुल ६ सय ५३ चौका हानिएका थिए । त्यसबापत एनसेल फाउन्डेसनले कुल २६ सय १२ वटा शैक्षिक सामग्री विद्यार्थीलाई वितरण गर्ने भएको हो ।
क्रिकेटदेखि कक्षाकोठासम्मको यस नवीन पहलले विद्यार्थीको पठनपाठनमा सकारात्मक परिवर्तन ल्याउने र शिक्षालाई प्रवद्र्धन गर्दै उज्ज्वल भविष्यका लागि अवसरका ढोका खोल्न मद्दत पुर्याउने विश्वास लिइएको छ । विद्यार्थीले प्राप्त गर्ने प्रत्येक शैक्षिक सामग्रीमा आवश्यक शैक्षिक सामग्रीजस्तै स्कुल ब्याग, कापी, सिसाकलम, इरेजर, कटरलगायतका स्टेसनरी सामान समावेश हुनेछन् । यसले स्रोतको अभाव घटाउन सहयोग गर्नेछ र विद्यार्थीको पठनपाठनमा योगदान गर्ने एनसेलले जनाएको छ ।
एनपिएलमा सबैभन्दा बढी चौका जनकपुर बोल्ट्सका खेलाडी लाहिरू मिलान्थाले हानेका छन् । उनले कुल ३५ चौका हानेका छन् भने पोखरा एभेन्जर्सका आन्द्रियस गौसले ३० चौका हानेका थिए । त्यसैगरी, लुम्बिनी लायन्सका रोहितकुमार पौडेलले २६ चौका, चितवन राइनोजका रविन्द्र बोपारा र सुदूरपश्चिम रोयल्सका सैंफ जैब प्रत्येकले २४ चौका हानेका थिए ।
‘क्रिकेट खेल र एनसेल फाउन्डेसनको सामाजिक कार्य दुवैका हिसाबले यो एनपिएल एकदमै उत्साहजनक रह्यो । क्रिकेटप्रतिको चाखलाई सामाजिक कार्यसँग जोड्दै शिक्षाका लागि स्रोत आवश्यक रहेका विद्यार्थीलाई शैक्षिक सामग्री प्रदान गर्न यो पहलकदमी गर्न पाउँदा हामी अत्यन्त खुसी छौँ । एनसेलकी कर्पोरेट कम्युनिकेसन एन्ड सिएसआर हेड विशाखालक्ष्मी खड्काले भनिन् ।
