सहकारीको रकम गोर्खा मिडियामार्फत अपचलनमा सघाएको आरोपमा पक्राउ परेका राष्ट्रिय स्वतन्त्र पार्टीका सभापति रवि लामिछानेलाई प्रहरीले बुधबार राति नै चितवनबाट पोखरा लगेको छ । बिहान लैजाँदा उनका समर्थकहरूको भिडभाड हुन सक्ने भएपछि प्रहरीले राति नै सडकमार्ग हुँदै पोखरा लगेको हो ।
चितवनको सहारा सहकारीको विषयमा अनुसन्धान गर्न प्रहरीले मंगलबार उनलाई चितवन लगेको थियो । बयान सकिएपछि बुधबार बेलुका नै लामिछानेलाई पोखरा पठाइएको चितवनका एसपी गौतम मिश्रले बताए । बुधबार बयान चलिरहँदा सडकमा रास्वपाका कार्यकर्ता र प्रहरीबिच भरतपुरमा झडप भएको थियो ।
लामिछानेविरुद्ध बुधबार मात्र पर्सामा पनि पक्राउ पुर्जी जारी भएको छ । गितेन्द्रबाबु (जिबी) राईको समूहले सञ्चालन गरेको वीरगन्जस्थित सानो पाइला सहकारीको रकम गोर्खा मिडियामा गैरकानुनी रूपमा गएको पाइएपछि पर्सामा पनि प्रहरीले उनीमाथि अनुसन्धान अघि बढाएको हो ।
यसअघि उनको कास्की, रुपन्देही र काठमाडौंमा बयान भइसकेको छ । जिबी राईको समूहले सञ्चालन गरेका पाँचवटा सहकारीको रकम गैरकानुनी रूपमा गोर्खा मिडियालगायत कम्पनीमा लगिएको थियो । लामिछाने गोर्खा मिडियाको सञ्चालक तथा प्रबन्ध–निर्देशक हुँदा कम्पनीको रकम खर्च गर्न उनको पनि भूमिका रहेको दाबी गरी पाँच जिल्लामा उनीविरुद्ध मुद्दा दायर हुन लागेको हो । सहकारी ठगीसहित संगठित अपराध र सम्पत्ति शुद्धीकरण मुद्दा उनीमाथि दायर गर्न लागिएको छ । रास्वपाले भने राजनीतिक प्रतिशोधका आधारमा उनीमाथि मुद्दा दायर भएको आरोप लगाउँदै आएको छ ।
