राष्ट्रिय गौरवको महाकाली करिडोरअन्तर्गत निर्माणाधीन दार्चुला–तिंकर सडक योजनालाई छुट्टै योजनाअन्तर्गत बनाउने मन्त्रीहरूले प्रतिबद्धता व्यक्त गरेका छन् । दार्चुला–तिंकर सडक योजनाको निरीक्षण गर्न आएका रक्षामन्त्री मानवीर राई र भौतिक पूर्वाधार तथा यातायात मन्त्री देवेन्द्र दाहालले दार्चुला–तिंकर सडकलाई छुट्टै योजनाको रूपमा अघि बढाउने प्रतिबद्धता जनाएका हुन् ।
निरीक्षण भ्रमणमा दार्चुलाबाट सांसद एवं पूर्वमन्त्री दिलेन्द्रप्रसाद बडू र प्रधानसेनापति अशोकराज सिग्देलसमेतको उपस्थिति थियो । दार्चुला–तिंकर सडक खण्डको हवाई निरीक्षणपछि सुनसेरामा भएको ब्रिफिङ कार्यक्रममा भौगोलिक अवस्थाका कारण पनि छुट्टै योजनाको रूपमा अघि बढाउन सबै सहमत भएको पूर्वमन्त्री बडूले जानकारी दिए ।
यसअघि ९ पुस ०८० मा तत्कालीन भौतिक पूर्वाधार तथा यातायातमन्त्री प्रकाश ज्वालाले पनि यस्तै प्रतिबद्धता जनाएका थिए । तर, सरकार परिवर्तन भएपछि निर्णय कार्यान्वयन हुन सकेन । अहिलेका भ्रमण विगतको भन्दा फरक रहेको बडूले बताए । उनले भने ‘दुई ठुला दल मिलेर बनेको सरकारले स्थायित्व प्रदान गर्छ । तत्कालै मन्त्री फेरबदल हुने अवस्था नहुने हुँदा अहिलेको भ्रमण उपलब्धिमूलक भएको म मान्दछु ।’
सेनाले ०७७ सालमामा सडक बनाउने जिम्मा लिएको१० वर्षमा ट्र्याक खोल्ने लक्ष्य लिएको छ ।
निर्माण ढिलाइले स्थानीय आक्रोशित
व्याँस गाउँपालिका– १ का स्थानीयले सडक निरीक्षणमा आएका मन्त्रीको टोलीलाई बाटो र सडक छिटो बनाउन माग गरेका छन् । व्याँस गाउँपालिका– १ का स्थानीय योगेशसिंह बोहराले स्थानीयको चाहना नेपालतर्फ कम्तीमा घोरेटो बाटो भए पनि खोलिदिनुपर्ने बताए । ‘हामीले हरेक वर्ष खलंगा आउजाउ गर्न भारतीय बाटो प्रयोग गर्नुपरेको छ,’ आक्रोश पोख्दै उनले भने ‘‘कालापानीको नाम मात्रै लिने, तर जनताका लागि घोरेटो बाटोसमेत बनाउन सक्दैनौ भने यहाँ किन आउँछौ । पटक–पटक हेलिकोप्टर लिएर आउने खर्चले यहाँको बाटो खुल्थ्यो होला ।’
यता व्याँस गाउँपालिका– ४ सुनसेराका स्थानीयले पनि नेतृत्वप्रति खबरदारी गरेका छन् । उनले भने ‘राष्ट्रिय गौरवको योजना भनिएको छ । अहिलेसम्म १३ किलोमिटर मात्रै सडक कहिकहि ट्र्याक खुलाइएको छ । सेनाले निर्माण गरिरहेको ७९ किलोमिटरको जिरो प्वाइन्टदेखि एक–दुई किलोमिटरसम्म ट्र्याक्टर जान सक्ने अवस्था छ ।’
नेपाली कांग्रेस व्याँसका सभापतिसमेत रहेका नरेन्द्रदत्त भट्टले महाकाली करिडोरअन्तर्गत सुनसेरासम्म पनि नियमित यातायात सञ्चालन हुन नसकेको बताए । ‘सेनाले चाँडो बनाउला भन्ने सोचेको सडक पनि उस्तै छ । पटक–पटक हेलिकोप्टरमार्फत नेता आएर यहाँको विकास हुनेवाला छैन्,’ उनले भने, ‘यो ठाउँको सडकको ट्र्याक खुलाउन बजेट दिनुप¥यो ।’
