२२ नोभेम्बरदेखि अस्ट्रेलियाविरुद्धको पाँचमध्ये चार टेस्टमा जित निकाल्दा मात्र भारत फाइनलमा पुग्न सक्ने
घरेलु मैदानमै न्युजिल्यान्डसँग ३–० ले टेस्ट सिरिज गुमाएपछि भारतको विश्व टेस्ट च्याम्पियनसिपको फाइनल खेल्ने सम्भावना कमजोर बनेको छ । मुम्बईमा भएको तेस्रो तथा अन्तिम टेस्टमा भारत न्युजिल्यान्डसँग २५ रनले पराजित भयो । न्युजिल्यान्डले चोथो इनिङ्समा एक सय ४७ रनका सहज लक्ष्य दिएको थियो । भारत एक सय २१ रनमै अलआउट हुँदा न्युजिल्यान्डले २५ रनको रोमाञ्चक जित निकाल्यो । न्युजिल्यान्डले पहिलो इनिङ्समा दुई सय २५ रन तथा दोस्रो इनिङ्समा एक सय ७४ रनको योगफल बनाएको थियो । भारतले पहिलो इनिङ्समा दुई सय ६३ रन बनाएको थियो ।
अब विश्व टेस्ट च्याम्पियनसिपअन्तर्गत २२ नोभेम्बरदेखि अस्ट्रेलियाविरुद्ध सिरिज हुँदै छ । भारतले फाइनल स्थान पक्का गर्न अस्ट्रेलियालाई कम्तीमा ४–० ले हराउनुपर्छ । अस्ट्रेलियासँग दुई टेस्ट मात्र गुमाउँदा भारत यसपटक उपाधि दौडबाट बाहिरिनेछ । यसविपरीत न्युजिल्यान्डको अन्तिम दुईमा पुग्ने सम्भावना बलियो देखिएको छ ।
विश्व टेस्ट च्याम्पियनसिपमा पाँच राष्ट्रबिच फाइनल पुग्ने होडबाजी छ । अस्ट्रेलिया, दक्षिण अफ्रिका र श्रीलंकाको सम्भावना उत्तिकै छ ।
इंग्ल्यान्ड, पाकिस्तान, वेस्ट इन्डिज र बंगलादेश फाइनलको दौडबाट बाहिरिसकेका छन् । सन् २०२३–०२५ को विश्व टेस्ट च्याम्पियनसिपको अंक तालिकामा अस्ट्रेलियाले १२ खेलबाट ९० अंक जोडेको छ । भारतले १४ खेलबाट ९८ अंक जोडेको छ । अस्ट्रेलिया शीर्ष र भारत दोस्रो स्थानमा छन् । भारतले श्रीलंका, न्युजिल्यान्ड र दक्षिण अफ्रिकाका तुलनामा धेरै खेल खेलेको छ । तेस्रो स्थानमा रहेको श्रीलंकाले नौ टेस्टबाट ६० अंक जोडेको छ । दक्षिण अफ्रिकाले आठ टेस्टबाट ५२ अंक हात पारेको छ ।
पूर्वखेलाडीबाट आलोचना
घरेलु मैदानमा नराम्रो हारको सामना गरेपछि भारतीय टोलीका पूर्वदिग्गज खेलाडीहरूले आलोचना गरेका छन् । पूर्वकप्तान सचिन तेन्दुलकरले हारेपछि भारतका प्रत्येक खेलाडीले आत्मसमीक्षा गर्नुपर्ने सुझाव दिएका छन् । ‘घरमै ३–० ले पराजित हुनु राम्रो होइन, हामी न्युजिल्यान्डसँग दुई दशकपछि घरेलु मैदानमा पराजित भएका छौँ,’ सचिनले भने, ‘अब सबै खेलाडीले प्रत्येक खेलमा गरेका गल्ती र आत्मसमीक्षा गर्नुपर्छ ।’ न्युजिल्यान्डविरुद्धको टेस्ट सिरिजका लागि खेलाडीले खराब सर्ट चयन गरेको र अभ्याससमेत कमी भएको उनले बताए ।
पूर्व ब्याट्सम्यान वासिम जाफरले न्युजिल्यान्डले भारतलाई सवै पक्षमा पराजित गरेको प्रतिक्रिया दिएका छन् । ‘न्युजिल्यान्डले पहिलोपटक भारतलाई उसैको भूमिमा सवै पक्षमा हरायो, टेस्टमा वास्तविक जितको हकदार पाहुना टोली हो,’ जाफरले भने, ‘भारतीय खेलाडीले समीक्षा गर्नुपर्छ ।’ पूर्वअलराउन्डर इरफान पठानले अहिलेसम्मकै खराब हार भएको जनाए । ‘मेरो करिअरममा आफ्नै भूमिमा यस्तो हार देखेको थिइनँ,’ पठानले भने, ‘छनोटकर्तादेखि खेलाडीले गल्ती भएका स्थानमा सच्याउनुपर्छ ।’
यसैगरी, इंग्ल्यान्डका पूर्वक्रिकेटर माइकल भानले न्युजिल्यान्डको प्रशंसा गरेका छन् । ‘भारतमाथिको जित अविश्वसनीय थियो, यसमा पनि क्लिनस्विप गर्नु सामान्य होइन,’ भानले भने, ‘भारतीय खेलाडीले तीनवटै टेस्टमा संघर्ष गरेको पाएँ ।’ युवराज सिंहले टेस्टका खेलाडी खेलाडी फिट नभएको जनाए । ‘आइसिसी टी–२० विश्वकपको सफलतापछि हामीले खराब नतिजा सामना गरेका छौँ,’ युवराजले भने, ‘न्युजिल्यान्डविरुद्ध खेलाडी तयार नभएको पाएँ ।’
