नवलपुरको कावासोतीमा गैँडासँग मोटरसाइकल ठाेक्किँदा दुईजना गम्भीर घाइते भएका छन्।
पूर्व–पश्चिम राजमार्गअन्तर्गत कावासोती नगरपालिका– ८ खरकट्टा जंगलमा बाटो क्रस गर्दै गरेको गैँडासँग ना.३३प ४२४२ नम्बरको मोटरसाइकल ठाेक्किँदा खाएको जिल्ला प्रहरी कार्यालय नवलपुरका प्रहरी नायब उपरीक्षक जेसी शाहले बताए।
दुर्घटनामा दोलखा जिल्लाको बैतेश्वर गाउँपालिका– ४ घर भई हाल काठमाडौं कागेश्वरी मनोहरा– ७ निवासी ३० वर्षीय प्रदीप न्यौपाने र ३५ वर्षीय कृष्ण दाहाल घाइते भएका छन्। घाइते दुवैको अवस्था गम्भीर रहेको प्रहरीले जनाएको छ।
घाइतेहरूको मध्यविन्दु जिल्ला अस्पताल डण्डामा उपचार भइरहेको छ। गैँडा भने जंगलतर्फ पसेको प्रहरीले जनाएको छ।
