लिगको पहिलो खेलमा ललितपुरसँग पराजित काठमाडौँले दोस्रो खेलमा चितवन शक्तिलाई ३–१ ले पाखा लगायो
काठमाडौं स्पाइकर्सले एभरेष्ट महिला भलिबल लिगमा मंगलबार पहिलो जित निकालेको छ । राष्ट्रिय खेलकुद परिषद् (राखेप) कभर्ड हलमा भएको खेलमा काठमाडौंले चितवन शक्तिलाई ३–१ को रोमाञ्चक सेटमा हराउँदै पहिलो जित हात पारेको हो । यसअघि सोमबार काठमाडौं ललितपुरसँग पराजित भएको थियो । काठमाडौं समग्रमा २१–२५, २५–१०, २५–२२ र २५–१७ ले विजयी भयो ।
पहिलो सेटमा उत्कृष्ट प्रदर्शन चितवन दोस्रो र तेस्रो सेटमा कमजोर देखियो । यही दुई सेटमा बाजी मार्दै काठमाडौंले लिगमा पहिलो जित दर्ता गर्न सफल भयो । जितसँगै काठमाडौंले दुई खेलबाट तीन अंक जोडेको छ । चितवनले दुई खेलबाट समान तीन अंक बटुलेको छ । चितवनले पहिलो खेलमा गण्डकी थन्डर्सलाई सहजै पाखा लगाएको थियो ।
यसअघि कर्णालीले लिगमा लगातार दोस्रो जित हात पारेको थियो । रोमाञ्चक तथा प्रतिस्पर्धात्मक खेलमा कुमार राईको प्रशिक्षणमा रहेको कर्णालीले गण्डकी थन्डर्समाथि ३–२ सेटको जित हात पार्यो । कर्णालीले पहिलो खेलमा मधेश प्रदेश युनाइटेडलाई हराएको थियो । गण्डकीविरुद्धको प्रतिस्पर्धामा कर्णालीले पहिलो सेट गुमाएको थियो । कर्णालीले त्यसपछिका लगातार दुई सेट जित्दै २–१ को अग्रता बनाएको थियो ।
पहिलो सेटमा गण्डकी २५–१५ ले विजयी भएको थियो । त्यसपछि कर्णाली संयमित हुँदै २५–२२ र २५–१७ ले जित्यो । गण्डकीलाई खेलमा रहन चौथो सेट जित्नुपर्ने थियो । हारले कर्णाली ३–१ ले विजयी हुने थियो । महत्वपूर्ण सेटमा गण्डकीले एक पक्षीय खेल देखायो । कर्णालीको कमजोर ब्लकको फाइदामा गण्डकीले चौथो सेटमाथि २५–१९ ले कब्जा जमायो । यस नतिजासँगै खेल २–२ को सेटमा पुग्यो ।
पाँचौँ तथा निर्णायक सेटमा कर्णालीले गण्डकीलार्ई १५–१२ ले निराश बनायो । लगातार दुई जितसँगै कर्णालीले दुई खेलबाट पाँच अंक बटुल्यो । दुई खेलमा जित दिलाउन महत्वपूर्ण योगदान दिएकी ग्रिसकी एनेस्थेसियाले लिगमा सोचे जस्तो सुरुवात भएको बताइन् । ‘हामीले महिला लिगमा सोचे जस्तो सुरुवात गर्यौँ,’ उनले भनिन्, ‘टिम उत्साहित छ आउने खेलमा ऊर्जा मिलेको छ ।’ एभरेस्ट महिला लिगमा सहभागी हुन उनी आइतबार मात्र नेपाल आएकी थिइन् । एनेस्थेसिया ग्रिसको घरेलु लिगमा परिचित अनुहार हुन् । उनी ग्रिसको राष्ट्रिय भलिबल टोलीकी महत्वपूर्ण सदस्य हुन् ।
लगातार दोस्रो खेलमा पराजित गण्डकी
गण्डकीको यो लगातार दुई खेलमा हार हो । गण्डकीको एक अंक छ । गण्डकीले चितवनलाई पहिलो खेलमा नतिजा सुम्पिएको थियो । पहिलो खेलमा गण्डकी चितवनसँग २५–२२, १९–२५, २५– २३ र २५–१७ ले पराजित भएको थियो । चितवनले पहिलो, तेस्रो र चौथो सेट जित्दै जित हात पारेको थियो । पहिलो सेटमा ४ अंकले पछि परेको चितवनले उत्कृष्ट पुुनरागमन गर्दै १२ अंक बटुल्यो । पहिलो सेटमा १८ अंक हुँदासम्म गण्डकी र चितवनबीच कडा प्रतिस्पर्धा चलेको थियो । दुवै टोली पहिलो सेटमा २२–२२ को बराबरीमा थिए ।
दोस्रो सेटमा गण्डकीले ९–५ को अग्रता लियो
तेस्रो सेटमा चितवनले सुरुमै अग्रता लियो । सुरुवातदेखि नै अग्रता बनाएको चितवनले १८–१० को बलियो अग्रता बनायो । २२–१५ को अवस्थामा गण्डकीले उत्कृष्ट कमब्याक गरेको थियो । खेल २४–२३ को अवस्था सम्म आयो । तेस्रो सेटको अन्तिममा चितवनी सुर्या सरसुरीले स्पाइक प्रहार गर्दै टोलीलाई तेस्रो सेटमा विजयी गराइन् । चौथो सेटमा गण्डकीले अग्रता लिएको थियो ।
