दसैँको पूर्वसन्ध्यामा नेपाल प्रहरीका प्रवक्ता डिआइजी दानबहादुर कार्कीको गीत सार्वजनिक भएको छ। कार्कीले लेखेको ‘दसैँ रमाइलो’ बोलको गीतमा राजेशपायल राई र मेलिना राईले स्वर भरेका छन्।
दीपक शर्माको संगीत, श्यामस्वेत रसाइलीको एरेन्ज रहेको गीतको भिडियोमा दीपाश्री निरौला, प्रियंका कार्की र सरोज ओली फिचर्ड छन्। दसैँको रौनक देखिने गीतमा तीनैजनाले टीका र जमरा लगाएर छमछमी नाचेका छन्।
करणसिंह चासिरको छायांकन, भूपेन्द्र अधिकारीको सम्पादन रहेको गीतको भिडियो कोरियोग्राफी तथा निर्देशन जेरी भण्डारीले गरेका छन्।
प्रवक्ता कार्कीले दुई साताअघि मात्रै प्रहरीको पीडा र भावना उजागर गरिएको ‘फूलको वासनासरी’ बोलको गीत सार्वजनिक गरेका थिए।
