चन्द्रागिरि नगरपालिका– १ दहचोकस्थित इन्द्रदहमा लागेको मेला भर्न भक्तजनको घुइँचो लागेको छ। काठमाडौंको पश्चिमतर्फ ऐतिहासिक, धार्मिक, सांस्कृतिक, प्राकृतिक र पौराणिक महत्त्व बोकेको दहचोकस्थित इन्द्रदहमा स्नान तथा दर्शन गर्न भक्तजनको घुइँचो लागेको हो।
देवताका राजा इन्द्र उक्त दहमा आएर स्नान गरेको जनविश्वासअनुसार हरेक वर्ष इन्द्रजात्राको भोलिपल्ट यो मेला लाग्दै आएको छ। यही दहमा देवराज इन्द्रले स्नान गरेको जनविश्वासअनुसार आज बिहानैदेखि स्नान र दर्शनका लागि भक्तजन आउने क्रम रहेको चन्द्रागिरि नगरपालिकाका प्रमुख घनश्याम गिरीले जानकारी दिए।
दशनार्थीलाई सहज रूपमा स्नान र दर्शन गर्ने व्यवस्था मिलाइएको बताउँदै उनले आज साँझसम्म करिब २० हजारले मेला भर्ने अनुमान गरिएको उल्लेख गरे। आज मेला भर्न काठमाडौंसहित ललितपुर, भक्तपुर र उपत्यकाका आसपास क्षेत्रबाट धार्मिक पर्यटकको आगमन भइरहेको नगरप्रमुख गिरीले बताए।
मेलामा कुनै पनि संकट आइनपरोस् भनेर मंगलबार साँझ दह तथा त्यस परिसरमा दीप प्रज्वलन गरिएको थियो। इन्द्रायणी तथा नारायणको मन्दिर रहेको यस परिसरमा वासुकी नागको ढुंगासमेत कलात्मक रूपले राखिएको छ।
कलंकीबाट करिब नौ किलोमिटरको दूरीमा रहेको इन्द्रदहकाे धार्मिक तथा ऐतिहासिक महत्त्व रहेकाले मेला लोकप्रिय बन्दै गएको नगरप्रमुख गिरीले बताए। मेलामा सहभागी व्यक्तिको सुविधा तथा मेलालाई व्यवस्थित रूपमा सञ्चालन गर्न स्थानीय जनप्रतिनिधि, सुरक्षाकर्मीसहित करिब एक सय स्वयंसेवक परिचालन गरिएको छ।
इन्द्रदहको पोखरीको पानीमा स्नान गरेर छेउमा रहेको इन्द्रको दर्शन गर्नाले जन्मजन्मको पाप नाश हुने जनविश्वास रहेको छ। चन्द्रागिरि– १ का पूर्ववडाध्यक्ष राजेन्द्र केसीका अनुसार इन्द्रदहको परिसर करिब दुई सय रोपनीमा छ। भ्युटावर, सडक स्तरोन्नति, बहुउद्देश्यीय भवनलगायत पूर्वाधार निर्माण सुरु भइरहेकाले आन्तरिक धार्मिक पर्यटकको आगमन बढ्ने अपेक्षा गरिएको उनले बताए।
