सञ्चालनमा आएको दुई वर्षपछि मात्रै भरिन थाल्यो भन्सार यार्ड अहिले १२ सय सवारीसाधन बन्दरगाहको पार्किङमा
काठमाडौंको चोभारस्थित सुक्खा बन्दरगाह यतिवेला नयाँ सवारीसाधनले भरिभराउ छ । बन्दरगाहको यार्डमा मोटरसाइकलसहित १२ सयभन्दा धेरै सवारीसाधन रहेको इन्टरमोडल यातायात विकास समितिका कार्यकारी निर्देशक आशिष गजुरेलले बताए ।
अहिले बन्दरगाहपरिसरमा ६ सय ७९ गाडी र पाँच सय २५ मोटरसाइकल तथा स्कुटर छन् । जसमध्ये पाँच सय ३६ गाडी र मोटरसाइकल भन्सार जाँचपास गरेर चोभारमा ल्याइएको हो । चोभारबाटै भन्सार जाँचपास गर्ने गरी ल्याइएका गाडीको संख्या एक सय ४३ रहेको छ । यार्डमा रहेका गाडीमध्ये करिब ९० प्रतिशत विद्युतीय कार रहेको गुजरेलले जानकारी दिए । पछिल्लो समय नेपालमा विद्युतीय सवारीसाधनको आयात ह्वात्तै बढेको छ ।
सरकारले डेढ अर्ब रुपैयाँ लगानीमा चोभारको हिमाल सिमेन्ट उद्योग भएको ठाउँमा सुक्खा बन्दरगाह निर्माण गरेको हो । तत्कालीन प्रधानमन्त्री शेरबहादुर देउवाले चैत ०७८ मा उद्घाटन गरेको सुक्खा बन्दरगाह अझै पूर्ण क्षमतामा सञ्चालनमा आउन सकेको छैन । तर, यतिवेला बन्दरगाहको आन्तरिक टर्मिनल क्षेत्र भने बिक्रीका लागि ल्याइएका नयाँ सवारीसाधनले भरिभराउन बनेको छ । यो बन्दरगाह सुरु भएसँगै व्यवसायीले काठमाडौंबाटै भन्सार जाँचपास गराउने बाटो खुलेको हो ।
पछिल्लो समय बन्दरगाहले कमाइ गर्न थालेको कार्यकारी निर्देशक गजुरेलले बताए । सञ्चालनमा आएको दुई वर्षपछि बल्ल सुक्खा बन्दरगाहमा व्यावसायिक चहलपहल बढ्न थालेको व्यवसायीहरू पनि बताउँछन् ।
प्रतिदिन गाडीको सय र दुईपांग्रेको ५० रुपैयाँ भाडा
अहिले आन्तरिक टर्मिनलमा गाडी राखेको प्रतिदिन सय रुपैयाँ र मोटरसाइकल तथा स्कुटर पार्किङ गरेर राखेको ५० रुपैयाँ तिर्नुपर्ने कार्यकारी निर्देशक गजुरेलले बताए । जसले बन्दरगाह व्यस्त हुनुका साथै आम्दानी पनि बढेको छ । उनले भने, ‘पछिल्लो समय गाडीको आयात पनि बढ्दै गएसँगै बन्दरगाह पनि व्यस्त हुन थालेको छ ।’ सुरुवाती समयमा सुक्खा बन्दरगाहमा आइसी इन्जिनवाला गाडी धेरै आउँथे । तर, पछिल्लो समय इभी बढी आउन थालेका छन् । त्यसो त सामान बोकेका कन्टेनर पनि आउन थालेको उनको भनाइ छ ।
‘ढिलो भए पनि चोभार सुक्खा बन्दरगाह अब चल्न थाल्यो, क्षमताका हिसाबले आन्तरिक टर्मिनल शतप्रतिशत अकुपाई भइरहेको छ, भन्सार क्षेत्र भने २५ प्रतिशत मात्र चलेको छ,’ गजुरेलले भने, ‘चोभारमा ल्याएर गाडी र अन्य सामान भन्सार क्लियरेन्स गर्नेहरू कम छन्, काठमाडौं–निजगढ फास्ट ट्र्याक सञ्चालनमा आएपछि व्यवसायीले चोभारबाट भन्सार क्लियरेन्स गर्न थाल्ने अनुमान छ ।’ नेपाली सेनाले निर्माण गरिरहेको फास्ट ट्र्याक ०८३ भित्र निर्माण सम्पन्न गर्ने लक्ष्य छ ।
भन्सार जाँचपास भएर पार्किङमा छन् ६ सय गाडी
चोभार सुक्खा बन्दरगाहमा भन्सार क्षेत्र र आन्तरिक टर्मिनल गरी दुई भागमा छुट्याइएको छ । भन्सार क्षेत्रमा जाँचपास हुन बाँकी गाडी र सामान राखिन्छ । आन्तरिक टर्मिनलमा भन्सार क्लियर भएर आएका सवारीसाधन रहेका छन् । अहिले चोभारमा वीरगन्ज, भैरहवा, रसुवागढीलगायत विभिन्न नाकाबाट भन्सार जाँचपास गरी ल्याएर पार्किङमा राखिएका सवारीसाधन धेरै छन् ।
पार्किङमा कुन ब्रान्डका कति गाडी ?
चोभार बन्दरगाहमा चिनियाँ ब्रान्डका इभी गाडी धेरै छन् । एक दर्जनभन्दा बढी ब्रान्डका गाडी र मोटरसाइकल पार्किङमा रहेको देखिन्छ । पार्किङमा राखिएका दुईपांग्रे सवारीसाधन हिरो ब्रान्डका हुन् । हिरोको नेपाली विक्रेता चौधरी ग्रुपले मोटरसाइकल र स्कुटर बन्दरगाहमा पार्किङ गरेर राख्न थालेको हो ।
चोभारमा भन्सार जाँचपास गरेर ल्याइएका चारपांग्रे सवारीसाधनमध्ये सबैभन्दा धेरै एमजी ब्रान्डका कार छन् । चोभारको आन्तरिक टर्मिनलमा एमजीका एक सय ५३, बिवाइडीका एक सय १९, जिएसीका ९७, किङ्सलङका ३५, निटा ३४, केवाइसी २२, ओमोडा एक, निसान आठ, सेरेस २९, सोकोन १७, फोटोन १५, जेएसी ६ वटा गाडी रहेका छन् । भन्सार जाँचपास गर्न बाँकी विभिन्न ब्रान्डका एक सय ४३ गाडी छन् ।
कतिपयले चोभारबाटै भन्सार जाँचपास गर्ने गरी सवारीसाधन इन्ट्री प्वाइन्टमा रेकर्ड राखेर ल्याउँछन् । विक्रेताले गाडी खरिद गर्ने ग्राहक भेटिएपछि चोभारबाट भन्सार क्लियरेन्स गरेर लैजाने गरेका छन् । जसले तत्कालै मोटो रकम भन्सार तिरेर गाडी जाँचपास गरी गोदाममा लगेर थन्क्याउनुपर्ने बाध्यता कम भएको व्यवसायी बताउँछन् । त्यसो त काठमाडौंमा गाडी पार्किङ गरेर राख्नुपर्ने ठाउँसमेत कम छ । गाडी पार्किङ गर्न जग्गा भाडामा लिन पनि महँगो पर्छ । भन्सार जाँचपास भइसकेका गाडी पनि राख्न पाइने भएपछि आयातकर्ताको रोजाइमा चोभार बन्दरगाह पर्न थालेको छ ।
नयाँ सवारीसाधनले बन्दरगाह भरिएको छ : आशिष गजुरेल, सिइओ, इन्टरमोडल यातायात विकास समिति
यतिवेला चोभार सुक्खा बन्दरगाह गाडी र मोटरसाइकलले भरिभराउ छ । अहिले साढे सात सय गाडी र पाँच सयजति मोटरसाइकल पार्किङमा होलान् । आन्तरिक टर्मिनल क्षेत्र भन्सार जाँचपास भइसकेका सवारीसाधन र गोदाम पार्टपुर्जाले भरिभराउ छन् । अहिले भन्सार क्षेत्र भने २५ प्रतिशत मात्र चलेको छ । काठमाडौं–निजगढ द्रुतमार्ग सञ्चालनमा आएपछि बल्ल चोभारमै भन्सार जाँचपास गर्ने गरी सवारीसाधन र मालवस्तु ल्याउने क्रम बढ्ने अपेक्षा छ ।
