नोभाक जोकोभिकलाई रोजर फेडेररसँगै आठौँपटक उपाधि जितेर कीर्तिमानी बराबर गर्ने अवसर
बिम्बल्डन च्याम्पियनसिप २०२४ को पुरुष एकलतर्फ उपाधिका लागि आज साबिक विजेता कार्लाेस अल्कारेज र नोभाक जोकोभिकबीच प्रतिस्पर्धा हुँदै छ । लन्डनस्थित सेन्टर कोर्टमा हुने खेलमा स्पेनिस खेलाडी अल्कारेज लगातार दोस्रोपटक उपाधि जित्ने लक्ष्यमा छन् । गत वर्ष पनि उनले जोकोभिकलाई नै हराएर उपाधि जितेका थिए । जोकोभिक भने प्रतियोगिताका निकै अनुभवी खेलाडी हुन् । उनले दशौँपटक फाइनलमा स्थान बनाउँदा सातपटक उपाधि जितिसकेका छन् ।
रोजर फेडेररले आठपटक जितेको उपाधि कीर्तिमान जोकोभिकलाई बराबर गर्ने अवसर छ । जोकोभिक र पिट सम्प्रसाले समान सातपटक उपाधि जितेका हुन् ।
सेमिफाइनलमा जोकोभिकले इटालियन खेलाडी लोरेन्जो मुसेट्टीलाई सीधा सेटमा हराएका हुन् । पहिलो सेटबाटै अग्रता बनाएका जोकोभिकले ६–४, ७–६ र ६–४ को जित निकालेका हुन् ।
यसअघि विश्व नम्बर ३ स्पेनिस अल्कारेजले लन्डनको सेन्टर कोर्टमा विश्व नम्बर ५ डेनियल मेदवेदेवलाई हराएका हुन् । तीन घन्टासम्म चलेको प्रतिस्पर्धामा अल्कारेजले ६–७, ६–३, ६–४ र ६–४ को जित निकालेका थिए । खराब लयबाट गुज्रिएका अल्कारेजले त्यसपछि कमब्याक गरेका हुन् । पहिलो सेट गुमाएपछि उनी पुनरागमन गर्न सफल भएका थिए ।
