काठमाडौं उपत्यका अपराध अनुसन्धान कार्यालयको टोलीले विश्वमा सञ्चालन हुने विभिन्न खेलहरूमा सट्टेबाजी गर्न प्रयोग हुने बेटिङ, वानएक्स बेट, जुवा ३६५ तथा क्रिफ्टोमार्फत रु. दुई अर्ब एक करोडभन्दा बढीको कारोबार गरेको अभियोगमा एकजनालाई पक्राउ गरी आज सार्वजनिक गरेको छ।
पक्राउ पर्नेमा काभ्रेपलाञ्चोक मण्डनदेपुर नगरपालिका– ८ घर भई हाल भक्तपुर सूर्यविनायक नगरपालिका–२ बस्ने २४ वर्षीय अनिल ढुंगाना रहेकाे काठमाडौं उपत्यका अपराध अनुसन्धान कार्यालयका प्रमुख एवं प्रहरी वरिष्ठ उपरीक्षक सानुराम भट्टराईले आज पत्रकार सम्मेलनमार्फत जानकारी दिए।
उनले भने, ‘ढुंगानाले ५५ वटा बैंक खातामार्फत उक्त कारोबार गरेको पाइएको र निजले वानएक्स बेट, जुवा ३६५ जस्ता अनलाइन बेटिङ वेबसाइटको प्रयोग गरी रु. दुई अर्ब एक करोडभन्दा बढीको कारोबार गरेको खुलेको छ।’
यसैगरी, निजसँग विभिन्न व्यक्तिका नाममा रहेका मोबाइल नम्बरबाट ११ वटा कनेक्ट आइपिएस, १५ वटा इसेवा वालेटमा लिंक गरिएका ५६ वटा बैंकमा हालसम्म रु. दुई अर्ब एक करोड १८ लाख ४४ हजार कारोबार गरेको प्रारम्भिक अनुसन्धानबाट भेटिएको प्रहरी वरिष्ठ उपरीक्षक भट्टराईले बताए।
बिनान्समार्फत दुईवटा खाता प्रयोग गरेर विभिन्न दुई सय ४३ प्रकारका क्रिप्टोकरेन्सीमा हालसम्म नेपाली रु. एक अर्ब ३४ करोड कारोबार गरेको भेटिएको जानकारी दिइएको थियो।
