पोखरा क्षेत्रीय विमानस्थलमा बन्ने हवाई इन्धन भण्डारणगृहको निर्माण कार्य निकै सुस्त भएको छ । पोखराबाट उडान गर्ने विमानलाई हवाई इन्धन उपलब्ध गराउने उद्देश्यले ०७९ कात्तिकमा ठेक्का सम्झौता भएको ३६ लाख लिटर क्षमताको भण्डारणगृह निर्माण सुस्त भएको हो । ६७ करोड २९ लाखमा रेलिगेयर–समानान्तर कन्स्ट्रक्सन र भारतीय कम्पनी बिएचएनले सहकार्य गरी निर्माण गरिरहेको परियोजनाको १ साउन ०८० मा शिलान्यास गरिएको थियो । शिलान्यास भएको १० महिना बितिसक्दा पनि निर्माणले गति लिन सकेको छैन । अहिले १२–१२ लाख लिटर हवाई इन्धन अटाउने भण्डारणगृह र १२ लाख लिटरको पानीट्यांकीको जग मात्रै हालिएको छ ।
दुई वर्षमा निर्माण सक्नुपर्ने सर्त भए पनि शिलान्यासपछि निर्माण सुरु भएको १२ महिनामा सक्ने लक्ष्य राखिएको थियो । तर, १० महिनासम्म जग मात्रै हालिएकाले निर्माण अवधि थपेर कात्तिकसम्म पु¥याइएको समयमा पनि काम सक्न गाह्रो हुने देखिन्छ । सो परियोजना प्रमुख रहेका आयल निगमका उपनिर्देशक प्रदीप यादवले कात्तिकसम्म जुनसुकै हालतमा भण्डारणगृह निर्माण सक्न निर्देशन दिएको बताए । ‘सात महिनामा काम सक्न निर्माण कम्पनीलाई पनि जानकारी गराएको छु । सात महिनामा काम नसकिए मैले परियोजनाको जिम्मेवारी लिनेछैन,’ उनले भने ।
परियोजना निर्माणमा अस्वाभाविक ढिलाइ भएकाले तोकिएको समयभन्दा बढी अवधि दिन नसकिने यादवले बताए । पोखरा विमानस्थल सञ्चालनमा आएपछि अन्तर्राष्ट्रिय उडान थपिएर हवाई इन्धनको माग बढ्ने भन्दै निगमले भण्डारण क्षमता वृद्धि गर्न थालेको हो । आयल निगमले लामो समयपछि हवाई इन्धनको स्थायी भण्डारणगृह निर्माण गरेको हो । यसअघि दाङ, जनकपुर र झापामा अस्थायी प्रकृतिको ‘बन्डेड ट्यांक’ राखिएको थियो ।
पोखरा विमानस्थलस्थित निगमको हवाई इन्धन डिपो प्रमुख सुमन पुडासैनीका अनुसार अहिले दैनिक १८ हजारदेखि २२ हजार लिटरसम्म इन्धन खपत भइरहेको छ । ‘बेमौसममा भने आठदेखि १० हजार लिटरसम्म इन्धन खपत हुने गरेको छ,’ उनले भने ।
पोखरामा अहिले ६४ हजार लिटर क्षमताको मात्रै भण्डारण रहेकाले वृद्धि आवश्यक रहेको पुडासैनीले बताए । पोखरा विमानस्थलमा ३६ लाख लिटर क्षमताको भण्डारणगृह तयार भएपछि अन्तर्राष्ट्रिय उडान गर्ने विमानलाई पनि इन्धन सुविधा उपलब्ध गराउन समस्या नहुने परियोजना प्रमुख यादवले जानकारी दिए ।
कात्तिकसम्म भण्डारणगृह नबने जिम्मेवारी छाड्छु : प्रदीप यादव, परियोजना प्रमुख
कात्तिकसम्म भण्डारणगृह निर्माणको काम सक्नु भनेको छु । बुधबार पोखरा विमानस्थल निर्माणस्थल पुगेर स्टोरेज ट्यांक निर्माणको सामान्य पूजा गरेर फर्केको छु । सात महिनामा काम नसकिए मैले परियोजनाको जिम्मेवारी लिनेछैन । तोकिएको समय गुजार्ने र म्याद थपेर लागत बढाउनेलगायतका विकृति रोक्नु जरुरी छ ।
