प्रो क्लब च्याम्पियनसिप टी–२०
पर्साको वीरगन्जस्थित नारायणी रंगशालामा जारी प्रो क्लब च्याम्पियन टी–२० क्रिकेट प्रतियोगिताको दोस्रो दिन भारतको वन्डर क्लब नोयडाले नेपाल आर्मीलाई एक सय रनको लक्ष्य दिएको छ ।
पहिले ब्याटिङ गरेको वन्डरले निर्धारित २० ओभरमा आठ विकेट गुमाउँदै ९९ रन बनाएपछि आर्मीले एक सय रनको लक्ष्य पाएको हो ।
नोयडाका लागि कप्तान हर्सित सेठीले ४५ बलमा २० रन र ऋतिक अरोराले २३ बलमा २० रन बनाए । यस्तै, वंशी बेदीले ११ बलमा १० रन बनाए ।
नोयडालाई सामान्य रनमा रोक्ने क्रममा आर्मीका बलर साहब आलमले चार विकेट लिए । उनले चार ओभरमा केवल चार रन खर्चिए । यस्तै, कुशल मल्ल, सोमपाल कामी र बसिर अहमदले एक–एक विकेट हात पारे ।
अहमदले चार ओभरमा १२ रन दिए भने कामीले ४ ओभरमा ३२ रन र कुशलले चार ओभरमा २० रन दिए ।
प्रतियोगितामा नेपालका तीन विभागीय टोली आर्मी, पुलिस र एपिएफसहित पर्सा ११ तथा भारतको युपी ११ र वन्डर्स क्लब नोइडाले प्रतिस्पर्धा गरिरहेका छन् ।
सिंगल राउन्ड रोविनको खेलपछि शीर्ष चार टोली सेमिफाइनलमा प्रवेश गर्नेछन् ।
जहाँ लिगमा पहिलो र चौथो हुनेबीच पहिलो सेमिफाइनल हुनेछ भने दोस्रो र तेस्रो हुने टोलीबीच दोस्रो सेमिफाइनल भिडन्त हुनेछ ।
आजै दिउँसो सवा १ बजे हुने खेलमा एपिएफ क्लब र भारतको युपी ११ भिड्नेछन् ।
