पुल्चोकस्थित इन्जिनियरिङ अध्ययन संस्थानको इन्जिनियरिङतर्फको स्नातक तहको प्रवेश परीक्षा फेरि अनिश्चित बनेको छ ।
शुल्कवृद्धिको विषयबाट सुरु विवादका कारण प्रवेश परीक्षा र फाराम भर्ने मिति रोकिँदै आए पनि सोमबारको बैठकले प्रवेश परीक्षा र फारम भर्ने मिति तोकेको थियो ।
तर, मंगलबार इन्जिनियरिङ अध्ययन संस्थानका प्रवेश परीक्षा बोर्डका अध्यक्ष, सदस्यसहित सल्लाहकारले संयुक्त राजीनामा दिएपछि २२ असोजका लागि तोकिएको प्रवेश परीक्षासमेत रोकिने भएको हो ।
बोर्डका अध्यक्ष प्रा.डा. सुशीलबहादुर बज्राचार्य, सदस्यहरू उपप्राध्यापक किरणचन्द्र दाहाल, सहप्राध्यापक डा. सञ्जीवप्रसाद पाण्डे, सल्लाहकारहरू सहप्राध्यापक डा. सुरज लामिछाने र सदस्यसचिव विदुर ढकालले राजीनामा दिएका छन् ।
राजीनामा दिनेमा परीक्षा शाखाका सहायक डिन प्रा.डा. हिक्मतराज जोशी पनि छन् । राजीनामापत्रमा छोटो समयमा प्रवेश परीक्षा सञ्चालन गर्न नसकिने उल्लेख छ ।
‘उल्लेखित पत्रअनुसार उक्त मितिमा आवेदन फाराम भराउन तथा परीक्षा सञ्चालन गर्न नसकिने भएकाले ४ साउनको पत्रबाट गठन भएको प्रवेश परीक्षा बोर्डका हामी तपसिलका अध्यक्ष, सदस्य तथा सल्लाहकारहरूको संयुक्त राजीनामा पेस गरेका छौँ,’ पत्रमा भनिएको छ ।
सोमबार बसेको विद्यार्थी संगठन, डिन कार्यालयलगायत सरोकारवालाको बैठकले १७, १८ र १९ असोजसम्म फाराम भर्ने समय थप गरेको थियो । बैठकले २२ असोजदेखि प्रवेश परीक्षा सञ्चालन हुने निर्णय गरे पनि पुनः परीक्षा नै अनिश्चित बनेको छ ।
यसअघि शुल्कवृद्धिमा विवाद भएपछि फाराम भर्न स्थगित गरिएको थियो । विद्यार्थीले शुल्कवृद्धि गर्न नहुने भन्दै आन्दोलन गरेपछि निर्णय फिर्ता लिइएको थियो । एकपछि अर्को विवाद बढ्दै जाँदा विद्यार्थीको भविष्य नै अन्योल हुने अवस्थासमेत सिर्जना भएको छ ।
यसअघि इन्जिनियरिङको स्नातक तहतर्फको शुल्क सात लाख ७५ हजार रुपैयाँ पु¥याइएपछि विवाद सुरु भएको थियो । विद्यार्थीको अनशन र दबाबपछि शुल्कवृद्धिको निर्णय फिर्ता लिए पनि अन्य विवाद बढेपछि प्रवेश परीक्षा नै अन्योलमा परेको छ ।
भागबन्डाको विरोध
नेपालकै इन्जिनियरिङ क्षेत्रको उच्च शैक्षिक संस्था मानिएको पुल्चोकमा विद्यार्थी नेतालाई भागबन्डा गरिएपछि विरोध भएको हो । पुल्चोक क्याम्पसका विभागीय प्रमुखहरूले नै मंगलबार दलीय रूपमा पद भागबन्डा गरेका थिए । जसको सर्वत्र विरोध भइरहेको छ ।
पुल्चोक क्याम्पसका ६ जना विभागीय प्रमुखले मंगलबार विज्ञप्ति निकाल्दै विद्यार्थी संगठनलाई क्याम्पस चलाऊ भनेर जिम्मेवारी सुम्पिएका थिए ।
इन्जिनियर तथा पूर्वाधारविद् सूर्यराज आचार्यले प्राध्यापकहरूले जिम्मेवारी स्ववियुलाई सुम्पिनु लज्जित विषय रहेको बताए ।
‘यो कलेज प्रतिभाशाली विद्यार्थी उत्पादन गर्ने थलो हो, तर विद्यार्थी र प्राध्यापकका पनि भ्रातृ संगठन छन्, यो लज्जित विषय हो,’ उनले भने, ‘प्राध्यापकहरूको धरातल राम्रो नहुँदा विद्यार्थीमा पनि समस्या देखिएको छ, त्यसकारण प्राध्यापक र विद्यार्थी भ्रातृ संगठन बन्द गर्नुपर्छ । र, सरकारले थप लगानी गर्नुपर्छ ।’
अखिल क्रान्तिकारीका उपाध्यक्ष जिपी मैनालीले प्राध्यापकहरूको निर्णयप्रति कडा आपत्ति जनाए । ‘इन्जिनियरिङ अध्ययन संस्थान हो कि एकान्तकुनाको यातायात कार्यालय ! बस व्यवसायी संघ सञ्चालक समितिका सदस्यहरूजस्ता किन देखिन थाले पुल्चोक क्याम्पस मुख्यालयमा बडेबडे कुर्सीमा बस्नेहरू ! लाज ढाक्नुस्,’ उनले भने, ‘प्रतिष्ठित अध्ययन संस्थान नै बदनाम हुन थाल्यो ! गैरजिम्मेवारीपनले हद पार गर्न लागेन र !’
(*प्रस्तुत समाचारमा असावधानिका कारण यसअघि नेपाल इन्जिनियरिङ कलेजको तस्बिर प्रयोग हुन गएकोमा क्षमायाचना गर्दछौँ । हाम्रो असावधानिका कारण नेपाल इन्जिनियरिङ कलेजलाई परेको असर प्रति पनि क्षमायाचना गर्दै अप्रासंगिक तस्बिर हटाएको जानकारी गराउँदछौँ । सम्पादक)
