फाइनल खेल वर्षाले प्रभावित भएपछि डिएलएस पद्धतिमा हङकङलाई १३ रनले हराउँदै नेपाल च्याम्पियन
नेपाली राष्ट्रिय महिला क्रिकेट टोलीले चारदेशीय टी–२० शृंखला जितेको छ । शनिबार मलेसियामा भएको फाइनलमा हङकङलाई डकवर्थ लेविस (डिएलएस) पद्धतिमा १३ रनले हराउँदै नेपालले उपाधि जितेको हो । दोस्रो इनिङ्समा नेपालले ब्याटिङ गरिरहँदा वर्षा भएपछि खेल पुनः सुचारु हुन सकेन । यसअघि सानदार इनिङ्स सुरु गरेको नेपाल च्याम्पियन भएको हो । शृंखलामा च्याम्पियन नेपाल र उपविजेता हङकङसहित आयोजक मलेसिया र कुवेतको सहभागिता थियो । लिग चरणमा नेपाल शीर्ष स्थान तथा हङकङ दोस्रो हुँदै फाइनल प्रवेश गरेका हुन् ।
नेपालले पहिलो खेलमा हङकङलाई ६ विकेट र दोस्रो खेलमा कुवेतलाई ३४ रनले पराजित गरेको थियो । शुक्रबार भएको तेस्रो खेलमा भने नेपाल मलेसियासँग ६ विकेटले पराजित भएको हो । हङकङ पहिलो खेलमा नेपालसँग पराजित हुँदा मलेसियालाई १० विकेट र कुवेतलाई १६ रनले पराजित गर्दै उपविजेता भएको थियो ।
वर्षाले खेल अगाडि बढ्न सकेन
मलेसियाको राजधानी क्वालालम्पुरस्थित बायुमास ओभल क्रिकेट मैदानमा एक सय २ रनको विजयी लक्ष्य पछ्याएको नेपालले सानदार सुरुवात गरेको थियो । जवाफी ब्याटिङ गरिरहेको नेपालले ५.३ ओभरमा एक विकेट गुमाएर ३७ रन बनाउँदा वर्षा भयो । फाइनल खेलमा दुवै टोली निर्धारित २० ओभर नै खेल्न चाहन्थे । तर, वर्षा नरोकिएपछि खेलमा नेपाल विजयी भएको हो ।
ओपनर सीता रानामगर १३ बलमा १३ रन बनाएर अविजित थिइन् । उनले एक चौका हिर्काएकी हुन् । यता, तेस्रो नम्बरमा क्रिजमा आएकी इन्दु बर्माले पनि १९ बलमा १९ रन बनाइन् । इन्दुले २ चौका प्रहार गर्दै सीतालाई साथ दिँदा वर्षा भएको थियो । ओपनर काजल श्रेष्ठ भने गोल्डेन डकआउट भइन् । काजललाई इक्रा सहारले दोस्रो बलमै एलबिडब्लू धरापमा पारेकी थिइन् । नेपालले अतिरिक्त ५ रन पाएको थियो । कप्तान रुविना क्षेत्री, अश्मिना कर्माचार्य, कविता जोशी, कविता कुँवर, खुसी डंगोल, अप्सरी बेगम, सम्झनाकुमारी खड्का र पूजा महतोले ब्याटिङ नै गर्नुपरेन ।
चम्किइन् खुसी
बलर खुसी डंगोल चम्किएपछि टस हारेर ब्याटिङ गरेको हङकङले ठूलो स्कोर बनाउन सकेन । प्लेयर अफ दी म्याच खुसीले तीन ओभरमा ८ बल डट खेल्दै २० रन मात्रै खर्चिएकी थिइन् । १.३ ओभरमा पहिलो विकेट लिएको नेपालले २.२ ओभरमा दोस्रो विकेट लिएपछि सानदार सुरुवात गरेको थियो । १०.२ ओभरमा तेस्रो विकेट लियो । यसपछि मात्रै हङकङले आफ्नो स्कोर बोर्ड बढाएको हो । निर्धारित २० ओभरमा हङकङले मात्र एक सय एक रन बनाएको थियो ।
हङकङकी का यिङ चानले सर्वाधिक २९ रन बनाइन् । ४५ बल खेलेकी चानलाई खुसीले बोल्ड गरेकी हुन् । १९ रन बनाएर खेलिरहेकी मारिना एन्टोनियालाई पनि खुसीले १९ रनमै बोल्ड गर्दै पेभिलियन फर्काएकी थिइन् । एन्टोनियाले दुई चौका प्रहार गर्दा २० बलको सामना गरेकी हुन् ।
यसैगरी, सान्जिन शाहजादले अविजित १४, यासमिन दासवानीले ११ तथा इक्रा सहारले अविजित १० रन बनाइन् । यसअघि आठ बलमा ६ रन बनाएकी नातसा तारालाई काजलले इन्दु बर्माबाट रनआउट गराएकी थिइन् । अर्की ओपनर मारिको ताविथा तीन बल खेलेर शून्य रनमै पेभिलियन फर्केकी हुन् । बलिङतर्फ खुसीसँगै अस्मिना र कविता जोशीले समान एक विकेट लिएका हुन् ।
एसिया छनोटमा ध्यान
चारदेशीय शृंखला जितेपछि नेपालको ध्यान आइसिसी महिला टी–२० विश्वकप एसिया छनोटमा हुनेछ । नेपाली टोलीले यही प्रतियोगिताको तयारीका लागि चारदेशीय शृंखला खेलेको हो । शृंखलापछि अन्तिम खेलको रूपमा थाइल्यान्डसँग खेल्ने तालिका छ । छनोट खेल ३१ अगस्टमा मलेसियामै हुनेछ । ९ सेप्टेम्बरसम्म हुने एसिया क्षेत्र छनोटमा नेपालसहित बहराइन, भुटान, मलेसिया, कतार र संयुक्त अरब इमिरेट्स (युएई) समूह ‘ए’मा छन् । नेपालले पहिलो खेल ३१ अगस्टमा मलेसिया, १ सेप्टेम्बरमा बहराइन, ३ सेप्टेम्बरमा भुटान, ४ सेप्टेम्बरमा कतार र ६ सेप्टेम्बरमा युएईसँग खेल्ने तालिका छ । समूह ‘बी’मा चीन, हङकङ, कुवेत, म्यानमार र थाइल्यान्ड छन् । दुवै समूहका शीर्ष दुई टोली सेमिफाइलनमा पुग्नेछन् । फाइनलमा स्थान बनाउने दुवै टोली विश्वकप खेल्न छनोट हुनेछन् ।
