नेपाली राष्ट्रिय पुरुष फुटबल टोलीका लागि भारतको बेंग्लोरमा चलिरहेको १४औँ दक्षिण एसियाली (साफ) च्याम्पियनसिप सुखद रहेन । तीनमध्ये दुई खेलमा हारले नेपाललाई समूह चरणभन्दा माथि उक्लन दिएन । तर, समूह चरणको अन्तिम खेल नेपालका लागि विशेष रह्यो । किनकि, १५ वर्षपछि साफमा नेपालले पाकिस्तानविरुद्ध जित हात निकाल्यो ।
मंगलबार समूह ‘ए’को आफ्नो अन्तिम खेलमा नेपालले पाकिस्तानलाई १–० ले हराएको हो । सान्त्वना जितसँगै नेपालले १४औँ साफको यात्रा टुंग्याएको छ । नेपाललाई अन्तिम खेलमा जित दिलाउने क्रममा आशिष चौधरीले डेब्यु गोल गरे । फिफाको प्रतिबन्धपछि अन्तर्राष्ट्रिय फुटबलमा फर्किएको पाकिस्तानको १४औँ साफको यात्रा सुखद भएन । पाकिस्तानले समूहका सबै तीन खेल गुमायो । पहिलो खेलमा पाकिस्तान आयोजक भारतसँग ४–० ले पराजितभयो । दोस्रो खेलमा साफको आमन्त्रित टोली कुवेतसँग पनि पाकिस्तान ४–० ले नै पराजित भएको थियो ।
यता, नेपाल भने उद्घाटन खेलमा कुवेतसँग ३–१ ले पराजित भएको थियो । दोस्रो खेलमा नेपाल भारतसँग भिडेको थियो । भारतसँगको खेल २-० ले गुमाएपछि नेपाल एक खेलअघि नै समूहचरणबाट बाहिरिएको थियो । कुवेतविरुद्धको खेलमा नेपाल स्ट्राइकर अञ्जन विष्टले एक मात्र गोल गरेका थिए । नेपाली फुटबल इतिहासमा सर्वाधिक १३ अन्तर्राष्ट्रिय गोलको कीर्तिमान बराबरी गर्न अञ्जन एक गोलले टाढा छन् । नेपालका लागि नीराजन रायमाझी र हरि खड्काले समान १३ अन्तर्राष्ट्रिय गोल गरेका छन् । यी दुवै खेलाडीका रेकर्ड पछ्याइरहेका अञ्जन पाकिस्तानसँगको खेलमा बेन्चमै बसे ।
साफ च्याम्पियनसिपको साबिक उपविजेता नेपाल सन् २०१५ पछि समूह चरणबाट बाहिरिएको हो । नेपाल र पाकिस्तानबीच १७ पटक खेल भएको छ । नेपालले पाँच खेलमा जित निकालेको छ । पाकिस्तानले नेपालमाथि ७ खेलमा जित हात पार्यो । यी दुई राष्ट्रबीच पाँच खेल बराबरीमा सकिएका छन् । गत वर्ष नेपालले मैत्रीपूर्ण खेलमा पाकिस्तानलाई १–० ले हराएको थियो ।
आशिषको निर्णायक गोल
बेंग्लोरको कान्तिराव रंगशालामा नेपाल र पाकिस्तानबीच पहिलो हाफमा गोलरहित बराबरी भएको थियो । खेलको ८०औँ मिनेटमा नेपालले १–० को अग्रता लियो । लाकेन लिम्बूले डिबक्सबाहिरबाट दिएको पासमा आशिषले सशक्त भली प्रहार गर्दै बललाई जाली चुमाए ।
प्रशिक्षक भिन्सेन्जोले साफ च्याम्पियनसिपमा युवा खेलाडीलाई बढी मौका दिने क्रममा आशिषलाई दुई खेलमै प्रतिस्पर्धा गराए । आशिषले कुवेतविरुद्धको पहिलो खेलमा ७३औँ मिनेटमा मैदान प्रवेश गरेका थिए । अन्तर्राष्ट्रिय खेलको एक्सपोजर लिने क्रममा उनले १७ मिनेट मैदानमा बिताए ।
कुवेतसँग औसत प्रदर्शन गरेका आशिषले भारतसँगको खेलमा मौका पाएनन् । पाकिस्तानसँगको खेलमा उनले दोस्रो हाफमा पूरै समय बिताए । समग्रमा आशिषले साफ च्याम्पियनसिपमा ६३ मिनेट मैदानमा बिताए । नेपाललाई महŒवपूर्ण जित दिलाउने क्रममा निर्णायक गोल गरेका आशिष दंग छन् । उनले राष्ट्रिय टोलीबाट गोल गर्ने सपना पूरा भएको बताएका छन् । ‘मेरो सपना पूरा भएको छ,’ खेलपछि आयोजित पत्रकार सम्मेलनमा उनले भने, ‘अझ राष्ट्रका लागि धेरै गर्न बाँकी छ ।’
घरेलु फुटबलमा उनी चर्च ब्वाइज क्लबसँग आबद्ध छन् । गत महिना सहिद स्मारक ‘ए’ डिभिजन फुटबलमा चर्च ब्वाइजले पहिलो सहभागितामै उपाधि जित्ने क्रममा आशिषको महत्वपूर्ण योगदान थियो । चर्च ब्वाइज ‘बी’ डिभिजनमा बढुवा हुँदा पनि उनको प्रदर्शन तारिफयोग्य थियो । ‘बी’ डिभिजन लिगमा उनी प्रतियोगिताकै उत्कृष्ट खेलाडी बनेका थिए ।
दुवै हाफमा गोल अवसर
पाकिस्तानसँगको प्रतिस्पर्धामा नेपालले धेरै गोल अवसर सिर्जना गरेको थियो । यद्यपि, नेपाली खेलाडीले पाकिस्तानको डिफेन्स दोस्रो हाफमा एकपटक मात्र तोडे । पहिलो हाफ सकिन लाग्दा विमल घर्तीमगरले डिबक्सभित्रबाट प्रहार गरेको बललाई पाकिस्तानका गोलरक्षक युसुफ बटले सहजै बचाए । खेलको ६८औँ मिनेटमा नेपालले अग्रता लिन चुकायो ।
देवेन्द्र तामाङले बायाँ साइडबाट प्रहार गरेको फ्रिकिक बल क्रसबारमा लागेको थियो । खेलको ७०औँ मिनेटमा एरिक विष्टको प्रहार पनि पोस्टमा लागेको थियो । खेलको अन्तिम इन्जुरी समयमा नेपालले सहज अग्रता अवसर गुमायो । पाकिस्तानको डिबक्सभित्र लाकेन लिम्बू र नवयुग श्रेष्ठले गोल गर्न सकेनन् ।
समग्रमा नेपालको प्रदर्शनबाट खुसी छु
भिन्सेन्जो अल्बर्टो, प्रशिक्षक, नेपाल
समग्रमा साफ च्याम्पियनसिपमा हामीले राम्रो प्रदर्शन गरेका छौँ । सबै खेलाडीले राम्रो खेले । नेपालको प्रत्येक खेलमा मैले इन्जोए गरेँ । खेलाडी परिवर्तन गरेँ । नेपाली खेलाडीमा पोटेन्सियल र व्यक्तिगत क्षमता छ । यसबीच हामीलाई समय चाहिन्छ । कम तयारीका बाबजुद हामीले साफमा जे गर्यौँ, त्यो धेरै हो । पहिलो हाफमा हामीले दुई अवसर बनायौँ, तर गोल भएन । पाकिस्तानसँगको खेलमा समयअनुसार हरेक क्षेत्रमा अपडेट गर्यौँ । हामीले स्ट्राइकरलाई मौका दियौँ । आशिषले गोल पनि गरे । यो नेपाली फुटबलका लागि धेरै महत्वपूर्ण छ । खेलमा कसैले गोल गर्नुपर्ने थियो । आज यो काम आशिषले गरे ।
गोल गर्ने सपना पूरा भयो
आशिष चौधरी, स्ट्राइकर, नेपाल
सानैदेखि नेपालका लागि गोल गर्ने सपना थियो । पाकिस्तानसँगको खेलमा त्यो सपना पूरा भएको छ । म मेरो परिवारलाई सहयोग गर्नेहरूलाई सम्झन चाहन्छु । अहिले एउटा सपना पूरा भएको छ । तर, म यतिमै खुसी हुनुहुँदैन । अझै देशका लागि धेरै गर्न बाँकी छ । देशका लागि अझै खेल्न बाँकी छ । म विदेश नै जानु थियो भने किन खेल्थेँ ? अहिले बल्ल म मेरो मिहिनेतको फल पाउँदै छु । परिवारबाट विदेश जान दबाब आएको थियो । तर, मैले कुनै पनि हालतमा मानिनँ । अहिले परिवारले विदेश जानुपर्दैन भनिरहेका छन् ।
