आइसिसी एकदिवसीय विश्वकप क्रिकेटको ग्लोबल छनोट समूह ‘ए’अन्तर्गत पहिलो खेलमा नेपाल अहिले टेस्टराष्ट्र जिम्बावेविरुद्ध खेलिरहेको छ ।
गृहमैदान हरारेमा जिम्बावेले टस जितेर पहिले बलिङ रोजेपछि ब्याटिङ गरिरहेको नेपालले दुई सय रन पूरा गरेको छ । नेपालले ३९औँ ओभरमा दुई विकेटको क्षतिमा दुई सय रन पूरा गरेको हो।
अहिले कप्तान रोहितकुमार पौडेल तथा अलराउन्डर कुशल मल्ल क्रिजमा छन् । कुशलले २२ बलमा एक छक्का र एक चौकाको सहायतामा १५ रन र रोहितले एक चौकाको सहायतामा ११ बलमा ७ रन बनाएका छन् ।
नेपालले ओपनर कुशल भुर्तेल र आसिफ सेखको उत्कृष्ट प्रदर्शनमा नेपालको ब्याटिङ सुदृढ बनेको हो ।
एक रनले शतक बनाउन चुकेका कुशलले दुई छक्का र १३ चाैकाको सहयोगमा ९५ बलमा ९९ रन बनाए । यस्तै, सय बल खेलेका आसिफले ६६ रनको योगदान दिए ।
नेपालले ३२ ओभरमा एक सय ७१ रनको अवस्थामा पहिलो विकेट गुमाएको थियो । त्यसपछि तीन रन थप्दा आसिफ पनि आउट हुन पुगे।
