चेन्नई सुपर किंग्स कीर्तिमानी रूपमा १०औँ पटक इन्डियन प्रिमियर लिग (आइपिएल) को फाइनलमा प्रवेश गरेको छ । १६औँ आइपिएलको पहिलो क्वालिफायरमा चेन्नईले गुजरात टाइटन्सलाई १५ रनले हराउँदै अन्तिम दुई स्थान पक्का गरेको हो । भारतीय मिडियाले आइपिएलको फाइनलसँगै धोनीले सन्न्यास लिने समाचार सम्प्रेषण गरिरहेका छन् । चेन्नईलाई फाइनलमा पुर्याएपछि कप्तान धोनीले अझै आफू सन्न्यासका सम्बन्धमा आठ वा नौ महिना प्रतीक्षा गर्ने स्पष्ट पारेका छन् ।
‘अहिले नै सन्न्यास लिन सक्दिनँ, अझै मसँग आठदेखि नौ महिना बाँकी छ,’ पत्रकार सम्मेलनमा धोनीले भने, ‘नयाँ संस्करणको आइपिएल अक्सन डिसेम्बरमा हुँदै छ, त्यसवेलासम्म केही न केही निर्णय आउनेछ ।’ धोनीले अहिलेदेखि नै सन्न्यासका बारेमा सोच्दै टाउकोदुखाइ नबोक्ने बताए । ‘म किन अहिलेदेखि सन्न्यासबारे विचार गरी टाउको दुखाइराख्ने हो,’ उनले भने । धोनीले आफू संसारको जहाँ भए पनि चेन्नईकै पक्षमा रहने जनाएका छन् । यद्यपि, सन्न्यास लिए पनि चेन्नईसँगै आबद्ध हुने उनको योजना छ ।
‘अहिले वा पछि सन्न्यास लिए पनि म कुनै न कुनै भूमिकामा चेन्नईसँग आबद्ध भइरहनेछु,’ आइपिएल र चेन्नईसँग गहिरो नाता भएको जनाउँदै धोनीले भने, ‘जनवरीमा हेरौँ, के हुन्छ । सम्भवतः फेरि यही पहेँलो जर्सीमा देखिनेछु ।’धोनीले चेन्नईलाई आफ्नो कप्तानीमा चारपटक आइपिएल उपाधि दिलाएका छन् । उनले आइपिएलको फाइनल फरक नहुने बताए । ‘मैले कहिल्यै पनि आइपिएलको फाइनलमा तनाव लिइनँ,’ धोनीले भने, ‘आइपिएलमा हामी सर्वाधिक सफल टोली हौँ, हामीजति फाइनलमा अन्य टोली पुगेका छैनन् ।’
