इन्डियन प्रिमियर लिग (आइपिएल)को फ्रेन्चाइज टोली मुम्बई इन्डियन्सले इंग्ल्यान्डका फास्ट बलर जोफ्रा आर्चरलाई १० करोड भारु (१६ करोड नेपाल)को प्रस्ताव राखेको छ । आर्चरलाई आइपिएलमा अन्यत्र नपठाउने उद्देश्यले मुम्बईले आकर्षक प्रस्ताव अगाडि सारेको हो ।
यसबारे आर्चरले कुनै प्रतिक्रिया जनाएका छैनन् । दुई पक्षबीच सम्झौता हुँदा आर्चरले इंग्ल्यान्डबाट अन्तर्राष्ट्रिय क्रिकेटमा सहभागिता जनाउँदा मुम्बईबाट अनुमति लिनुपर्ने हुन्छ । बेलायती सञ्चालमाध्यमका अनुसार आर्चरले मुम्बईको प्रस्तावबारे आफ्ना एजेन्टसँग छलफल गरेका छन् ।
चालू आइपिएलमा आर्चर चोटका कारण बाहिरिएका थिए । मुम्बईले खेलेका ११ मध्ये पाँच खेलमा मात्र आर्चर उपलब्ध भए । घुँडाको चोटको शल्यक्रिया गर्नुपर्ने भएका कारण आर्चर आइपिएलबाट बाहिरिएका हुन् । उनको स्थानमा मुम्बईले क्रिस जोर्डनलाई समावेश गरेको छ ।
इंग्ल्यान्ड फर्कनुअघि आर्चरले दुई विकेट मात्र लिएका थिए । यसपटकको आइपिएलमा उनको प्रतिओभर रेनरेट ९.५० रह्यो । अहिले मुम्बई १२ अंकका साथ तेस्रो स्थानमा छ । यसक्रमम मुम्बईले ६ जित र पाँच हारको सामना गरेको छ ।
मुम्बईले आर्चरलाई २०२४ सम्म सम्झौताको तयारी गरेको हो । दुई पक्षबीच सम्झौता हुँदा सन् २०२५ को आइपिएल अक्सनमा मात्र आर्चर समावेश हुन सक्नेछन् । यसअघि उनी मुम्बईमा रहनेछन् ।
बेलायती मिडियाहरूले आर्चरको ध्यान आइपिएलभन्दा पनि एसेज तथा अन्तर्राष्ट्रिय क्रिकेट प्रतियोगिता नै रहेको छ । अक्टोबर र नोभेम्बरमा एकदिवसीय विश्वकपमा इंग्ल्यान्डले सहभागिता जनाउँदा आर्चर मुख्य खेलाडी बन्न सक्छन् । इंग्ल्यान्ड विश्वकपको साबिक विजेता हो ।
