नेसनल लाइफ इन्स्योरेन्स कम्पनी लिमिटेडले आफ्ना अभिकर्ताका लागि दुई रात तीन दिनको ‘क्रुज डिनर एट नारायणी रिभर’ कार्यक्रम गरेको छ । कम्पनीले आफ्नो ०७९ चैतमा सञ्चालन गरेको अभिकर्ता मासिक योजनाअन्तर्गत लक्ष्य पूरा गर्न सफल अभिकर्ताका लागि यो कार्यक्रम गरेको हो । नारायणी नदीमा सञ्चालन गरिएको नेपालको एक मात्र क्रुजको यात्रा गराउनुका साथै उनीहरूलाई सौराहा भ्रमण पनि गराएको कम्पनीले जनाएको छ ।
कार्यक्रममा कम्पनीका प्रमुख कार्यकारी अधिकृतसहित प्रदेश प्रमुख, विभागीय प्रमुख तथा विभिन्न शाखाका शाखा प्रमुखहरूसहित देशभरबाट उत्कृष्ट व्यवसाय गरी योजनामा छनोट हुन सफल भएका करिब चार सयजना अभिकर्ता सहभागी भएको जनाइएको छ ।
यसका साथै प्रमुख कार्यकारी अधिकृत सुरेशप्रसाद खत्रीले उत्कृष्ट अभिकर्तालाई सम्मान कार्यक्रमको आयोजना गरेको कम्पनीले जनाएको छ । योजनामा छनोट भई सम्मानित हुन सफल अभिकर्तालाई प्रमाणपत्र र मेडल प्रदान गरेको जनाइएको छ । उक्त अवसरमा उपस्थित अभिकर्तालाई जीवन बिमा व्यवसायमा थप हौसला प्रदान गर्दै अभिकर्ताको व्यावसायिक दक्षता अभिवृद्धि गर्ने उद्देश्यले प्रशिक्षक मनोज भट्टराईले उत्प्रेरणा तथा व्यक्तित्व विकाससम्बन्धी प्रशिक्षण प्रदान गरेको कम्पनीले उल्लेख गरेको छ ।
