घरेलु मैदानमा जारी त्रिकोणात्मक शृंखलाको दोस्रो खेलमा नेपालले संयुक्त अरब इमिरेट्स (युएई)को सामना गर्दै छ । कीर्तिपुरस्थित त्रिवि खेलमैदानमा हुने खेल नेपालका लागि निकै महत्वपूर्ण छ । आजको खेल जित्दै नेपाल आगामी चार वर्षका लागि एकदिवसीय मान्यता जोगाउन चाहन्छ । साथै, विश्वकप छनोटको सम्भावना कायम राख्नेछ । हारले भने विश्वकप छनोटका लागि प्लेअफ खेल्नुपर्नेछ ।
एकदिवसीय मान्यतालाई बाँकी दुईमध्ये एक खेलमा जित अनिवार्य निकाल्नुपर्नेछ । लिग–२ मा ३३ खेलबाट १६ जितसहित ३४ अंक जोडेको नेपाल पाँचौँ स्थानमा छ । नेपालले पछिल्ला नौमध्ये आठ खेलमा जित निकालेको छ ।नेपालको जितले युएईको एकदिवसीय मान्यता धरापमा पर्नेछ । शीर्ष तीनको दौडबाट युएई बाहिरिसकेको छ । युएई ३३ खेलबाट ३१ अंकका साथ छैटौैँ स्थानमा छ ।
पहिलो खेलमा नेपालले पपुवा न्युगिनी (पिएनजी)लाई ५२ रनले हराएको थियो । पिएनजीले दोस्रो खेलमा युएईलाई ५६ रनले हराएपछि नेपाली खेलाडीको मनोबलसमेत उच्च छ । पछिल्लो खेलमा नेपालले बलिङ, ब्याटिङ र फिल्डिङमा उत्कृष्ट प्रदर्शन गरेको थियो ।
युएईविरुद्धसमेत सोही खेल प्रदर्शन गर्नेमा कप्तान रोहितकुमार पौडेल आशावादी छन् ।‘हामीले बाँकी खेलमा समेत यस्तै प्रदर्शन गर्छौं र आफ्नो लक्ष्य पूरा गर्नेछौँ,’ रोहितले पिएनजीविरुद्धको जितपछि भनेका थिए । पिएनजीविरुद्ध कीर्तिमानी लक्ष्य प्रस्तुत गर्दा ओपनर तथा ब्याट्सम्यान आसिफ शेखले खेलजीवनकै पहिलो शतक बनाएका थिए । प्लेयर अफ दी म्याच आसिफले एक सय १० बलमा एक सय १० रन बनाएका थिए । उनी दोस्रो खेलमा समेत लय कायम राख्ने योजनामा छन् । बलिङतर्फ सन्दीप लामिछानेले उत्कृष्ट प्रदर्शन जारी राखेका छन् । सन्दीपले पिएनजीविरुद्ध चार विकेट लिएका थिए ।
