स्पिनर मौसम ढकाल प्रशिक्षणका क्रममा घाइते भएपछि नेपाल क्रिकेट संघ (क्यान)ले उनको स्थानमा अर्का स्पिनर सन्दीप लामिछानेलाई समावेश गरेको छ । नेपाली राष्ट्रिय क्रिकेट टोली अहिले आइसिसी पुरुष विश्वकप लिग–२ अन्तर्गत त्रिकोणात्मक एकदिवसीय सिरिज खेल्ने क्रममा युएईमा छ । बुधबार नेट अभ्यासका क्रममा स्पिनर ढकाल घाइते भएका हुन् । क्यानले तत्कालै टोलीमा स्पिनरको अभाव पूरा गर्न पूर्वकप्तान सन्दीपलाई टोलीमा समावेश गर्दै युएई पठाएको छ ।
क्यानका कोषाध्यक्ष रोशनकुमार सिंहका साथमा बुधबार दिउँसो ३ बजेको उडानबाट सन्दीप युएई प्रस्थान गरेको कार्यवाहक सचिव दुर्गा पाठकले जानकारी दिएका छन् । सन्दीपले सम्भवतः बिहीबार युएईसँगको खेलमा प्रतिस्पर्धा गर्न सक्छन् । तर, मुख्य प्रशिक्षक मोन्टी देसाईले सन्दीप राख्ने वा नराख्ने पक्षमा अन्तिम निर्णय लिनेछन् । मुख्य प्रशिक्षक देसाईले गरेको थ्रो डाउनमा मौसमको दायाँ काँधमा चोट लागेको छ । त्यसपछि उनको काँधमा आइस राखियो । अहिले मौसमको अवस्थाको पूरा जानकारी नेपाली टोलीले दिएको छ ।
गत आइतबार मात्र सर्वोच्च अदालतले सन्दीपलाई विदेश जान अनुमति दिएको छ । क्यानले अदालतबाट स्विकृति पाएपछि सन्दीपलाई पनि नेपाली टोलीमा समावेश गर्न अन्तर्राष्ट्रिय क्रिकेट काउन्सिल (आइसिसी)सँग छलफल गरेको थियो । आइसिसीले समेत सन्दीपलाई युएईमा रहेको नेपाली टोलीमा समावेश हुन पाउने जनाएको छ । गत पुसमा पाटनको उच्च अदालतले सन्दीपलाई २० लाख धरौटीमा जेलमुक्त गरेको थियो । यद्यपि, अदालतले सन्दीपलाई विदेश जानमाथि रोक लगाएको थियो ।
धरौटीमा रिहा भएपछि सन्दीपले दुई साताअघि टियू मैदानमा भएको विश्वकप लिग–२ मा उत्कृष्ट प्रर्दशन गरी पुनरागमन गरेका थिए । यसक्रममा उनले चार खेलमा १३ विकेट लिए । सो सिरिजमा नेपाली टोलीबाट सर्वाधिक विकेट लिने सन्दीप थिए । त्यसपछि सन्दीपले युएईमा हुने सिरिजका लागि विदेश जान पाऊँ भनी अदालतमा निवेदन राखेका थिए । सर्वोच्च अदालतले गत आइतबार सन्दीपलाई विदेश जान पाउने फैसला गरेको थियो ।
आइसिसीसँग पत्राचार
यसअघि क्यानले युएई र पपुवा न्युगिनीविरुद्धको त्रिकोणात्मक एकदिवसीय सिरिजका लागि नेपाली टोली घोषणा गर्दा सन्दीपको नाम समावेश गरेन । सन्दीप समावेश नभएको नेपालले सिरिजअन्तर्गत सोमबार पपुवा न्युगिनीलाई चार विकेटले हराएको थियो । नेपालले आइसिसी विश्वकप लिग–२ मा लगातार पाँच खेल जितको कीर्तिमान राखेको छ ।
क्यानका कार्यवाहक सचिव दुर्गाराजले सन्दीपलाई युएई पठाउन आइसिसीसँग पत्राचार भइसकेको बताए । आइसिसीसँग पत्राचार भएपछि क्यानले सन्दीपलाई सिरिजमा सहभागी हुन युएई पठाएको हो । सन्दीपले बिहीबार बिहानको नेट सेसनमा अभ्यास गर्न सक्छन् । सर्वोच्च अदालतले विदेश भ्रमण गरेर फर्किएको १५ दिनभित्र सन्दीप उपस्थित हुनुपर्ने जनाएको छ । सन्दीपलाई युएई लगेर फर्काउने जिम्मा क्यानले नै लिने पाठकले बताएका छन् । ‘सन्दीप हाम्रो खेलाडी हो, हाम्रो खेलाडीको जिम्मा हामी लिन्छौँ’, उनले भने ।
विश्वकप लिग–२ मा यो नेपालको अन्तिम विदेश भ्रमण हो । त्यसपछि नेपालले घरेलु मैदानमा पपुवा न्युगिनी र युएईसँग खेल्नेछ । नेपालले शीर्ष तीनमा रहँदै सोझै एकदिवसीय मान्यता रक्षा गर्न अब ७ मध्ये ६ खेल जित्नुपर्ने हुन्छ । शीर्ष पाँचमा रहँदा नेपालको एकदिवसीय मान्यता बच्नेछ । यसका लागि नेपालले चार खेल जित्नुपर्ने हुन्छ । नेपाल २९ खेलमा २८ अंकका साथ छैटौँ स्थानमा छ ।
सन्दीप र अर्जुन ‘द हन्ड्रेड’को ड्राफ्टमा समावेश
पूर्वकप्तान सन्दीप र युवा ब्याट्सम्यान अर्जुन साउद इंग्ल्यान्डमा हुने द हन्ड्रेड फ्रेन्चाइज क्रिकेट प्रतियोगिताको ड्राफ्टमा समावेश भएका छन् । तेस्रो संस्करणको प्रतियोगितामा सन्दीप र विकेटकिपर ब्याट्सम्यान विदेशी कोटाको ड्राफ्टमा परेका हुन् ।
यसअघि सन्दीप हन्ड्रेड बलमा छनोट भएका थिए । तर, भिसा प्रक्रिया ढिला भएका कारण उनले प्रतियोगिता खेल्न पाएनन् । अर्जुन पहिलोपटक हन्ड्रेडको ड्राफ्टमा परेका हुन् । प्रतियोगितामा खेल्नका लागि ड्राफ्टमार्फत छनोट हुनुपर्नेछ । द हन्ड्रेड बलको ड्राफ्ट लिस्टमा सन्दीप र अर्जुनसहित कुल तीन सय ६८ खेलाडी छन् । प्लेयर ड्राफ्ट २३ मार्चमा हुनेछ । प्रतियोगिता १ अगस्टमा हुनेछ ।
