आइसिसी पुरुष विश्वकप लिग– २ अन्तर्गत त्रिकोणात्मक एकदिवसीय शृंखलामा अहिले नेपाल र पपुवा न्युगिनीबीच खेल भइरहेको छ ।
टस जितेर नेपालले फिल्डिङ रोजेपछि ब्याटिङ गरिरहेको पपुवा न्युगिनीले दोस्रो विकेट गुमाएको छ ।
गुल्सन झाले नेपालका लागि दोस्रो सफलता दिलाएका छन् । ५९ बलमा २९ रन बनाएका किप्लिन डोरिगालाई गुल्सनले १७औँ ओभरको चौथो बलमा आउट गरे ।
त्यसअघि चौथो ओभरको पहिलो बलमा नेपालका स्ट्राइक सिमर सोमपाल कामीले पहिलो सफलता दिलाएका थिए । उनले पपुवा न्युगिनीका ओपनर ब्याटर टोनी उरालाई बोल्ड गरे ।
नेपालले आज चारजना सिमरलाई मैदानमा उतारेको छ । सोमपाल, करणसँगै आजै एकदिवसीयमा डेब्यु गरेका युवा फास्ट बलर प्रतिश जिसीले पनि बलिङ कमान्ड सम्हालेका छन् ।
ताजा अवस्थामा पपुवा न्युगिनीले २१औँ ओभरमा दुई विकेट गुमाएर ७५ रन बनाएको छ ।
विश्वकप लिग– २ मा नेपालले विदेशी भूमिमा खेल्ने यो नै अन्तिम शृंखला हो । यसपछि नेपालले घरेलु मैदानमै अन्तिम शृंखला खेल्नेछ ।
