कर्णाली प्रदेशकै जेष्ठ गाउँपालिका अध्यक्ष लछुमन गुरुङको निधन भएको छ ।
दैलेखको महाबु गाउँपालिकाका अध्यक्ष गुरुङको स्वास्थ्य सेवा कार्यालय दैलेखमा उपचारका क्रममा शुक्रबार निधन भएको हो । उनी ७६ वर्षका थिए ।
तीन दिनदेखि उनको स्वास्थ्यमा समस्या देखिएको थियो । दुई दिन स्थानीय मेडिकलमा उपचार गराएका गुरुङको स्वास्थ्यमा थप समस्या देखिएपछि आजै स्वास्थ्य सेवा कार्यालय लगिएको थियो ।
उपचारकै क्रममा उनको निधन भएको स्वास्थ्य सेवा कार्यालय दैलेखका स्वास्थ्य व्यवस्थापक धर्मराज रेग्मीले बताए ।
गत ३० वैशाखमा सम्पन्न स्थानीय तहको निर्वाचनमा कांग्रेसका उम्मेदवार रहेका उनी महाबु गाउँपालिका अध्यक्षमा विजयी भएका थिए ।
उनको शव आज कांग्रेस दैलेखको पार्टी कार्यालयमा श्रद्धाञ्जलीका लागि राखिएको थियो ।
शुक्रबार स्थानीय गैडाबाजमै श्रद्धाञ्जलीपश्चात दाहसंस्कार गरिने महाबु गाउँपालिकाले जनाएको छ ।
