नेपाल खेलकुद पत्रकार मञ्च (एनएसजेएफ) ले हरेक वर्ष आयोजना गर्दै आएको पल्सर स्पोर्टस् अवार्ड २०७८ अन्तर्गत पिपुल्स च्वाइस विधाको मनोनयन सोमबार सार्वजनिक गरेको छ । मञ्चले एक कार्यक्रम आयोजना गर्दै २३ फागुनमा हुने अवार्डअन्तर्गत पिपुल्स च्वाइस विधामा मनोनयनमा परेका पाँच खेलाडीको सूची सार्वजनिक गरेको हो । सो सूचीमा फुटबलका अञ्जन विष्ट, क्रिकेटका आसिफ शेख, भलिबलकी उषा भण्डारी, टेनिसकी अभिलाषा विष्ट र पौडीकी डुवाना लामा रहेका छन् ।
गत वर्ष राष्ट्रिय तथा अन्तर्राष्ट्रिय खेलमा प्राप्त उपलब्धिका आधारमा खेलाडीरूलाई मनोनयनमा राखेको खेलाडी छनोट समितिका संयोजक अञ्जन खड्काले बताएका छन् । मनोनयनमा परेकामध्येबाट विजेताको चयन ई–सेवामार्फत भोटिङ, फेसबुक लाइक, एनएसजेएफ सदस्यको मत र राष्ट्रिय खेल संघका मुख्य प्रशिक्षकको मतका आधारमा हुनेछ ।
अवार्डसँग ई–सेवाको तेस्रो वर्षको सहकार्य हो । मञ्चले डिजिटल पेमेन्ट पार्टनरका लागि ई–सेवासँग दुई वर्षका लागि सम्झौता नवीकरण गरेको छ । सम्झौतापत्रमा मञ्चका अध्यक्ष दुर्गानाथ सुवेदी र ई–सेवाका हेड अफ बिजनेस डेभलपमेन्ट आशिष प्रसाईंले हस्ताक्षर गरेका थिए ।
सम्झौतापत्रमा हस्ताक्षरपछि ई–सेवाका हेड अफ बिजनेस डेभलपमेन्ट प्रसाईंले पिपुल्स च्वाइस अवार्डमा जोडिन पाउँदा खुसी रहेको प्रतिक्रिया दिए । ‘खेल र खेलाडीलाई सम्मान गर्न १९ वर्षदेखि आयोजना हुनु सराहनीय काम हो,’ प्रसाईंले भने, ‘पिपुल्स च्वाइस अवार्ड खेलप्रेमी समर्थकहरूले खेलाडीहरूप्रति देखाउने मायाको माध्यम हो ।’ ई–सेवा भोटिङको मतभार ५० प्रतिशत हुनेछ । पत्रकार र मुख्य प्रशिक्षकको मतभार २५–२५ प्रतिशत रहने आयोजकले जनाएको छ ।
आठ विधामा खेलाडी र खेलकर्मी सम्मानित हुने
यस वर्षको अवार्डमा आठ विधामा खेलाडी र खेलकर्मीलाई सम्मानित गरिनेछ । उत्कृष्ट वर्ष खेलाडी पुरुष, महिला र युवा तथा उत्कृष्ट प्रशिक्षक विधाको मनोनयन पनि केही दिनमै सार्वजनिक गरिने मञ्चले जनाएको छ । लाइफटाइम एचिभमेन्ट अवार्ड, पारा एथलिट सम्मान, स्पेसल अवार्डको घोषणा २३ फागुनमै हुनेछ । यसपटक पनि एक अन्तर्राष्ट्रिय खेल पत्रकारलाई सम्मान गर्ने मञ्चले जनाएको छ । अवार्डअन्तर्गत उत्कृष्ट वर्ष पुरुष, महिला, युवा, पिपुल्स च्वाइस तथा प्रशिक्षक विधाका विजेताले पल्सर मोटरसाइकल पाउनेछन् ।
