बागमती गोल्डकप : त्रिभुवनलाई रोक्दै हिमालयन शेर्पा सेमिफाइनलमा

मकवानपुरको बागमती गाउँपालिकामा जारी पाँचौँ बागमती राष्ट्रिय गोल्डकप फुटबल प्रतियोगितामा विभागीय टिम त्रिभुवन आर्मीलाई पेनाल्टी सुटआउटमा रोक्दै हिमालयन शेर्पा क्लब सेमिफाइनलमा प्रवेश गरेको छ ।

जारी प्रतियोगिताको मंगलबारको खेल निर्धारित समयमा १–१ गोलको बराबरी भएपछि पेनाल्टी सुटआउटमा पुगेको थियो । पेनाल्टी सुटआउटमा हिमालयनले त्रिभुवन आर्मीलाई ४–२ गोलअन्तरले पराजित गरेको हो ।

हिमालयनका लागि विकास लामा, सत्यम शर्मा, विश्वास श्रेष्ठ र विदेशी खेलाडी इरेक वेलीले गोल गर्दा आर्मीका लागि कप्तान भरत खवास र टेकबहादुर बुढाथोकीले मात्रै गोल गर्न सके । आर्मीका दिनेश हेम्जनको प्रहार बाहिरिएको थियो भने कमलबहादुर थापाको प्रहार हिमालयन शेर्पाका गोलरक्षक दीप कार्कीले बचाउ गरेका थिए ।

यसअघि निर्धारित समयमा आर्मीका नवयुग श्रेष्ठले पहिलो हाफको २२औँ मिनेटमा पेनाल्टीमार्फत र हिमालयनका प्रिन्सले ५८औँ मिनेटमा गोल गरेका थिए । मंगलबारको खेलमो म्यान अफ दी म्याच हिमालयनका गोलरक्षक दीप कार्की भए । उनले नगद पाँच हजारसहित ट्रफी प्राप्त गरेका छन् ।

बागमती गाउँपालिका खेलकुद विकास समितिको आयोजनामा जारी प्रतियोगिताअन्तर्गत बुधबार नेपाल एपिएफ र मच्छिन्द्र क्लबबीच खेल हुनेछ । माघ ३ गतेसम्म चल्ने प्रतियोगिताको विजेताले नगद आठ लाख र उपविजेता टिमले नगद चार लाख प्राप्त गर्नेछ ।