मकवानपुरमा राति ९ बजेपछि देउसी–भैलो खेल्न नपाइने 

जिल्ला प्रशासन कार्यालय मकवानपुरले यस वर्ष तिहारको समयमा राति ९ बजेपछि देउसी–भैलो खेल्न रोक लगाएको छ। प्रशासनले एक सूचना जारी गर्दै राति ९ बजेसम्म मात्रै देउसी–भैलो खेल्न सर्वसाधारणलाई आग्रह गरेको छ।

जिल्ला प्रशासन कार्यालयका प्रशासकीय अधिकृत सरोजप्रसाद पौडेलद्वारा जारी सूचनामा तिहारमा देउसी तथा भैलोलगायतका सांस्कृतिक मनोरञ्जनात्मक क्रियाकलाप राति ९ बजेसम्म मात्र सञ्चालन गर्न भनिएको छ। यस्तै प्रशासनले चाडपर्वको बहानामा पटाका, भुइँचम्पा तथा आतिसबाजी नगर्न पनि आग्रह गरेको छ।

पटाका, भुइँचम्पा तथा आतिसबाजीजस्ता प्रज्वलनशील पदार्थको प्रयोगले स्वास्थ्य एवं सुरक्षालगायतका समग्र जनजीवनमा प्रतिकूल असर पर्ने उल्लेख गर्दै त्यस्ता पदार्थको भण्डारण, ओसारपसार, बिक्री–वितरण तथा प्रयोगमा पूर्णरूपमा बन्देज लगाइएको प्रशासनले जनाएको छ।

पटकाजन्य पदार्थ पड्काएमा वा बिक्री–वितरण गरेको पाइएमा कानुनबमोजिम कारबाही हुने प्रशासनले चेतावनी दिएको छ।