- वि.सं २o७९ कार्तिक ६ आइतबार
गत असोज अन्तिम साता वर्षासँगै आएको बाढीपहिरोले राष्ट्रिय प्रसारण लाइन (नेसनल ग्रिड)मा क्षति गरेपछि विद्युत् आपूर्ति अवरुद्ध भएको छ।
बाढीपहिरोले जुम्ला र कालिकोट खण्डमा ९० वटा पोल र तारमा क्षति भएपछि दुई सातादेखि विद्युत् आपूर्ति नभएको नेपाल विद्युत् प्राधिकरण जुम्ला वितरण केन्द्रका प्रमुख नरेशदत्त रावलले बताए। दुई सातादेखि नेसनल ग्रिड अवरुद्ध भएपछि स्थानीय घुघुत्ती र जाल्पादेवी साना जलविद्युत् आयोजनाको बिजुली जुम्ला सदरमुकाम खलंगामा काम चलाउ वितरण भइरहेको छ। यही बिजुली पनि २४सै घण्टा नियमित आपूर्ति हुने अवस्था छैन।
टोल र क्षेत्र क्लस्टर मिलाएर बिजुली आपूर्ति गर्ने गरिएको प्रमुख रावलले बताए। उनले भने, ‘स्थानीय स्तरमा उत्पादित बिजुली कम क्षमताको छ। अस्पताल, सुरक्षा निकायलगायत विशेष ठाउँलाई प्रथमिकता दिएर वितरण गरिएको छ भने नागरिकको घरमा कम्तीमा मोबाइलसम्म चार्ज गर्न होस् भनेर बिजुली आपूर्ति गरिएको छ।’
क्षति भएको स्थानमा बिजुलीका पोल गाड्ने र तार जोड्ने काम निरन्तर भइरहेको छ। सडक पनि अवरुद्ध भएकाले विद्युत् सामग्री ओसारपसारमा समस्या भएको छ। उनले भने, ‘हप्ता दिनभित्र नेसनल ग्रिड आपूर्ति हुने गरी मर्मतको काम भइरहेको छ।’
