आइएमई लाइफ इन्स्योरेन्सले स्थापनाको पाँचौँ वर्ष पूरा गरेको अवसर पारेर देशका सातवटै प्रदेशमा बृहत् स्वास्थ्य शिविर कार्यक्रम सञ्चालन गरेको छ । कम्पनीले सामाजिक उत्तरदायित्वअन्तर्गत सातै प्रदेशमा गरेको स्वास्थ्य शिविरबाट एक हजार तीन सयजना सर्वसाधारणले स्वास्थ्य जाँच गराएका छन् ।
कम्पनीका प्रमुख कार्यकारी अधिकृत कवि फुँयालले सातै प्रदेशका आठ स्थानमा स्वास्थ्य शिविर सञ्चालन गरिएको बताए । उनका अनुसार प्रदेश १ को सुनसरी चक्रघट्टीमा आँखा शिविर सञ्चालन गरिएको थियो । त्यस्तै, मधेस प्रदेशको बारा, कलैयामा दन्त शिविर, बागमती प्रदेशको चितवन, नारायणघाटमा पाठेघरको मुखको क्यान्सर शिविर कार्यक्रम गरिएको थियो । नारायणघाटमा बिपी कोइराला मेमोरियल क्यान्सर अस्पतालको सहकार्यमा शिविर आयोजना गरिएको कम्पनीले जनाएको छ ।
त्यस्तै, गण्डकी प्रदेशको लमजुङ, सोतिपसलमा जनरल स्वास्थ्य जाँच शिविर, लुम्बिनी प्रदेशको गुल्मी र बाँकेको राप्ती सोनारीमा आँखा शिविर सञ्चालन गरिएको थियो । कर्णाली प्रदेशको सुर्खेत, गुमीमा महिला स्वास्थ्य शिविर तथा सुदूरपश्चिम प्रदेशको कैलाली, टीकापुर–नारायणपुरमा पनि जनरल स्वास्थ्य जाँच शिविर सञ्चालन गरिएको कम्पनीले जनाएको छ ।
त्यस्तै, शुक्रबार देशभर गरिएको रक्तदान कार्यक्रममा पाँच सय ७१ जनाले रक्तदान गरेको जनाइएको छ । यसका साथै शनिबार गरिएको अभिकर्ता तालिममा सहभागी सात सय ४८ जनालाई तालिम दिई प्रमाणपत्र पनि वितरण गरिएको कम्पनीले जनाएको छ ।
०७४ भदौ १ गतेदेखि कारोबार सुरु गरेको इन्स्योरेन्सले सुरक्षा, बचत तथा लगानीलगायत ग्राहकका विभिन्न आवश्यकतासँग सम्बन्धित विविध व्यक्तिगत तथा सामूहिक बिमा योजना प्रदान गर्दै आइरहेको जनाएको छ । आफ्ना ग्राहकलाई सर्वसुलभ पहुँच, उत्कृष्ट बिमा लेखन, झन्झटमुक्त दाबी र व्यवसायअनुकूलको समाधान गर्ने लक्ष्य रहेको कम्पनीको भनाइ छ ।
जीवन बिमाबारेमा जनचेतना अभिवृद्धि गर्ने, जीवन बिमा सुविधाका माध्यमबाट ग्राहकको वित्तीय सुरक्षालाई बढवा दिने तथा राष्ट्रको विकासमा योगदान दिने परिकल्पनाका साथ काम गरिरहेको कम्पनीले जनाएको छ ।
