देशकै ठूलो सुन्धाराको जगन्नाथ देवलस्थित केन्द्रीय कारागारभित्र अध्ययन गर्ने शतप्रतिशत विद्यार्थीले राम्रो जिपिए ल्याएर एसइई परीक्षा उत्तीर्ण गरेका छन् । कारागारभित्र कैदी जीवन बिताइरहेकाहरूका लागि सरकारले छुट्टै विद्यालयको प्रबन्ध गरेको छ । विद्यालयमा कक्षा १२ सम्म अध्यापन हुँदै आएको छ ।
विद्यालयमा अध्ययनरत २३ मध्ये २१ विद्यार्थी एसइई परीक्षामा सहभागी भएका थिए । सहभागीमध्ये दश विद्यार्थीले ‘बी प्लस’ ल्याएका छन् । ‘बी’ ग्रेड ल्याएर उत्तीर्ण गर्ने विद्यार्थीको संख्या नौ छ । त्यस्तै, विद्यालयमा अध्ययनरत एकजना विद्यार्थी ‘ए’ ग्रेडमा उत्तीर्ण भएका छन् भने अर्का एकले ‘सी प्लस’ ल्याएका छन् ।
कारागार कार्यालय, जगन्नाथ देवलका प्रमुख डोरेन्द्र निरौलाले एसइईमा सहभागी कारागारभित्रका कैदीबन्दी विद्यार्थी अब्बल नम्बरका साथ उत्तीर्ण भएको बताए । उनले भने, ‘कारागारभित्र कक्षा १२ सम्मको पढाइ हुन्छ । यसपटक एसइई परीक्षामा २१ विद्यार्थी सहभागी थिए । जसमध्ये १० जनाले ‘बी प्लस’, ९ जनाले ‘बी’, एकजनाले ‘ए’ र अर्का एकले ‘सी’ ग्रेड ल्याएका छन् । सरसर्ती हेर्दा सबैले राम्रो नम्बर ल्याएर पास भएको देखिन्छ ।’
कारागारभित्र हाल तीन सय ४९ विद्यार्थी अध्ययनरत छन् । यो संख्या ०७८ मा तीन सय ७९ थियो । विद्यालयमा ०७२ देखि कक्षा ११ र १२ को अध्यापन हुँदै आएको छ । अध्यापनका लागि सरकारले नौवटा दरबन्दी स्वीकृत गरेको छ । विद्यालयमा कारागारभित्रकै कैदीबन्दीमध्येबाट अध्यापन हुँदै आएको छ । ०१९ देखि अनौपचारिक शिक्षा पढाइ हुँदै आएको कारागारभित्र एसएलसीसम्मको अध्ययन भने ०५० देखि सुरु भएको थियो । कारागारभित्रका कैदीबन्दी विद्यार्थी स्नातक र स्नातकोत्तर तहको परीक्षामा पनि सहभागी हुन सक्छन् । तर, अध्यापनको व्यवस्था भने गरिएको छैन ।