- वि.सं २o७९ असार ८ बुधबार
अदालतकै गेटमा व्यवसायीमाथि खुकुरी प्रहार घटनाका योजनाकार नौ महिनापछि पक्राउ परेका छन् । भक्तपुरका रमेश राजबाहकलाई प्रहरीको केन्द्रीय अनुसन्धान ब्युरो (सिआइबी)ले बुधबार पक्राउ गरेको हो ।
१० असोज २०७८ मा उच्च अदालत, विराटनगरको गेटमा व्यवसायी कमलसिंह लामामाथि खुकुरी प्रहार भएको थियो । खुकुरी प्रहार गर्ने महम्मद साजिद मियाँ र विमल कार्कीलाई त्यतिवेला नै प्रहरीले पक्राउ गरेको र अनुसन्धानको क्रममा राजबाहकले खुकुरी हान्न लगाएको खुलेको थियो । तर, राजबाहक फरार रहँदै आएका थिए ।
मध्यपुर ठिमीको सानोटारबाट उनलाई पक्राउ गरी जिल्ला प्रहरी कार्यालय मोरङ पठाइएको सिआइबीका एसपी कमल थापाले जानकारी दिए । उनीविरुद्ध जिल्ला अदालत मोरङमा ज्यान मार्ने उद्योग मुद्दा दर्ता छ ।
कम्पनीको मुद्दामा अदालत गएका वेला लामामाथि खुकुरी प्रहार गरी गम्भीर घाइते बनाइएको थियो । मोरङको कटहरी गाउँपालिका –६ मा रहेको मोरङ राजधानी इँटा उद्योगमा लामाले लगानी गरेका थिए । कम्पनीको विवाद अदालत पुगेपछि उनलाई खुकुरी हानेर हत्या गर्न खोजिएको प्रहरी अनुसन्धानमा खुलेको थियो ।
