- वि.सं २o७९ बैशाख ३१ शनिबार
सर्लाहीका विभिन्न पालिकाको तीनवटा वडामा नेपाली कांग्रेसका उम्मेदवार विजयी भएका छन्। शनिबार दिउँसोसम्म सार्वजनिक मत परिणामअनुसार जिल्लाको मलंगवा नगरपालिका, हरिपुर्वा नगरपालिका र पर्सा गाउँपालिकामा गरी तीनवटा वडाको अध्यक्षमा कांग्रेसका उम्मेदवार विजयी भएका हुन्।
जिल्ला निर्वाचन कार्यालयका अनुसार मलंगवा–१ मा नवलकिशोर राय ४ सय २८ मतसहित विजयी हुँदा हरिपुर्वा–१ मा ३ सय ७५ मतसहित श्यामबाबु राय विजयी भएका छन्। यस्तै, पर्सा गाउँपालिका–१ मा ४ सय ११ मतसहित सतेन्द्र यादव विजयी भएका छन्। निर्वाचन कार्यालयले घोषणा गर्न भने बाँकी रहेको जनाएको छ।
जिल्लाका दुई पालिका बरहथवा नगरपालिका र कौडेना गाउँपालिकाबाहेक अन्य पालिकाका अहिले धमाधम मतगणना कार्य चलिरहेको छ। अधिकांश पालिकामा राति अबेरसम्म मतपेटिका संकलन र रुजु गर्ने क्रम चलेकाले शनिबार ढिला गरी मतगणना सुरु भएको थियो।
