खेलाडी कल्याणकारी कोषलाई आर्थिक सहयोग

राष्ट्रिय खेलकुद परिषद् (राखेप)का सदस्यसचिव टंकलाल घिसिङले राष्ट्रिय खेलाडी कल्याणकारी कोषलाई आर्थिक सहयोग प्रदान गरेका छन् । नेपाल राष्ट्रिय तथा अन्तर्राष्ट्रिय खेलाडी संघका अध्यक्षसमेत रहेका कोषका सदस्यसचिव दीपक श्रेष्ठलाई सदस्यसचिव घिसिङले दुई लाख नौ हजार एक सय १४ रुपैयाँको चेक हस्तान्तरण गरेका हुन् ।

उनले चार महिनाको आफ्नो तलब सुविधाबराबरको रकम कोषलाई प्रदान गरेका हुन् । सरकारले घिसिङलाई गत १३ मंसिरमा राखेपको सदस्यसचिवमा नियुक्त गरेको थियो । घिसिङको नियुक्तिका साथै राखेपका तत्कालीन सदस्यसचिव रमेशकुमार सिलवालले आफ्नो बर्खास्तीविरुद्ध सर्वोच्च अदालतमा रिट दायर गरेका थिए । त्यसपछि सर्वोच्चको अल्पकालीन अन्तरिम फैसलाअनुसार घिसिङ चार महिना राखेपमा अनुपस्थित थिए । सर्वोच्चले गत २२ चैतमा सिलवालको रिट खारेज गरेपछि सदस्यसचिव घिसिङ पुनः राखेपमा फर्केका थिए । 

सदस्यसचिव घिसिङले भने, ‘काम गर्न नपाएको अवधिको सुविधा लिन सहज लागेन । खेलाडीकै हितलाई सम्झेर कोष सहयोग होस् भनेर उपलब्ध गराएको हुँ ।’