- वि.सं २o७८ फाल्गुण ११ बुधबार
भारतीय विदेशमन्त्री डा. एस. जयशंकरले भारत र चीनबीचको सीमा रेखाको यथास्थिति परिवर्तन अमान्य भएको बताएका छन् । उनले चीनबाट सीमारेखाको यथास्थिति एकपक्षीय रूपमा परिवर्तन गर्न लागिएको टिप्पणी गर्दै भारतले स्वीकार नगर्ने बताएका हुन् । यद्यपि सीमाका केही विषयमा उपलब्धि हासिल हुँदै गरेको पनि उनको भनाइ थियो ।
फ्रान्सको पेरिसमा आयोजित विज्ञहरूसँगको अन्तर्क्रिया कार्यक्रमलाई मंगलबार राति सम्बोधन गर्दै जयशंकरले लद्दाख क्षेत्रमा चीनले सीमा रेखा जबर्जस्ती बदल्न लागेको आरोप लगाए । यद्यपि चीनसँग केही महत्वपूर्ण क्षेत्रमा सहमति भएको र वार्ता जारी रहेको पनि उनको भनाइ थियो ।
भारत र चीनका सैन्य कमान्डरहरुबीच १३ औँ चरणसम्मको वार्ता भएको र संवाद जारी रहेको पनि उनको भनाइ थियो । ‘केही अन्य स्थानहरूमा अझै सहमति हुन सकेको छैन,’ उनले भने, ‘भारत र चीनबीच सीमा विवाद समाधान गर्नुको कुनै विकल्प छैन । यसका लागि कति समय लाग्छ भन्ने कुरा म भन्न सक्दिनँ । तर, समाधान गर्नैपर्छ ।’
भारत र चीनबीच उत्तर पूर्वी तथा उत्तर पश्चिमी हिमाली सीमा क्षेत्रमा दुई वर्षयता तनाब उत्पन्न हुँदै आएको छ । दुवैतर्फ ठूलो संख्यामा सैनिक तथा हातहतियार तैनाथी छ ।
