- वि.सं २o७८ फाल्गुण ११ बुधबार
जुम्लामा कोरोना संक्रमणका कारण एक महिलाको मृत्यु भएको छ । चन्दननाथ नगरपालिका–८ निवासी ३३ वर्षीया बाटु सुनारको कोरोनाका कारण बुधबार मृत्यु भएको प्रहरीले जनाएको छ ।
जिल्ला प्रहरी कार्यालय जुम्लाका प्रहरी नायब उपरीक्षक नरेन्द्र चन्दका अनुसार सुनारको बिहान साढे एक बजे निधन भएको हो । कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा उपचारका क्रममा उनको निधन भएको जनाइएको छ। प्रहरीका अनुसार मंगलबार दिउँसो प्रतिष्ठानमा उपचार गर्न आएकी सुनारको उपचारको क्रममा निधन भएको हो । उनको आरडिटी परीक्षण गर्दा कोरोना संक्रमण भएको थियो । प्रतिष्ठानका मेडिकल रेकर्डर मेघराज बुढाका अनुसार तेस्रो भेरियन्टबाट संक्रमित २८ जना कर्णाली प्रतिष्ठानमा भर्ना भएका थिए ।
दोस्रो लहरको संक्रमणका वेला २३ जनाको मृत्यु भएको जिल्ला प्रशासन कार्यालय जुम्लाको तथ्यांक छ ।
