- वि.सं २o७८ पौष ३ शनिबार
लमजुङ प्रहरीले नगदसहित आठजना जुवाडेलाई पक्राउ गरेको छ । प्रहरीले बेँसीशहर नगरपालिका–७ भीमसेनस्थानस्थित सुरेश श्रेष्ठको घरमा शुक्रबारराती साढे ९ बजेको समयमा हारजितको बाजी राखी जुवा (कौडा) खेल्दै गरेको अवस्थामा घरधनी सुरेश श्रेष्ठ सहित आठजनालाई पक्राउ गरेको हो ।
लमजुङका प्रहरी प्रमुख डिएसपी कृष्णबहादुर कार्कीका अनुसार प्रहरीले उनीहरूको साथबाट नगद दुई लाख १९ हजार दुई सय ५० रुपैयाँसहित १६ थान कौडासमेत बरामद गरेको छ । पक्राउ पर्नेमा बेँसीसहर नगरपालिकाका चारजना, सुन्दरबाजर नगरपालिकाको एकजना, मर्स्याङ्दी गाउँपालिकाको एकजना, तनहुँको एकजना र काभ्रे जिल्लाको एकजना रहेका छन् ।
पक्राउ परेका आठजनामाथि थप अनुसन्धान भइरहेको प्रहरीले जनाएको छ । उनीहरूविरुद्ध मुलुकी अपराधसंहिता जुवाअन्तर्गत मुद्दा चलाइने प्रहरीले जनाएको छ ।
