नेकपा एमाले राष्ट्रिय सभाका प्रमुख सचेतक खिमलाल भट्टराईले सरकारले सुकुम्बासीमाथि दमन गरेको टिप्पणी गरेका छन् । सोमबार बसेको राष्ट्रिय सभाको बैठकमा भट्टराईले दसैँको मुखमा नागरिकको हत्या हुनु दुःखद भएको बताउँदै तत्काल पीडितलाई क्षतिपूर्ति र न्याय दिन माग गरे ।

‘रुपन्देहीमा दसैँको मुखमा आएर भएको घटना दुःखदायी छ । सुकुम्बासी र भूमिहीनको व्यवस्थापन नगरी दसैँको मुखमा गोली प्रहार भएको छ । यो दसैँलाई दशा निम्त्याउने काम गृहमन्त्रीले गर्नुभएको छ। दसैँको मुखमा चारजनाको हत्या हुनु दुःखद छ। १८ जना घाइतेको उपचार र मृतक परिवारलाई तत्काल क्षतिपूर्ति दिनुपर्छ, घटनाको म भर्त्सना गर्दछु,’ भट्टराईले भने ।

वर्तमान गठबन्धनमा सहभागी दलहरूले अघिल्लो सरकारविरुद्ध गैरराजनीतिक र कुर्सी मोहका कारण मुद्दा दायर गरेको उनको आरोप छ । उनले प्रधानमन्त्री शेरबहाुदर देउवा बुढानीलकण्ठबाट बालुवाटार सुत्न मात्र आएको भन्दै सरकारले कुनै काम नगरेको बताए ।