अगस्टमा काबुल कब्जा गरेपछि कतारमा भएको पहिलो 'इन–पर्सन' बैठकका क्रममा तालिबानले अफगानिस्तानको केन्द्रीय बैंकको सञ्चितिमा फ्रिज नगर्न संयुक्त राज्य अमेरिकालाई आग्रह गरेका छन्। विदेशमन्त्री आमिर खान मुट्टाकीलाई उदृत गर्दै भ्वाइस अफ अमेरिकाले प्रकाशित समाचारमा भनिएको छ, “दुवै पक्षले शनिबार ‘आफ्नो सम्बन्धमा नयाँ पृष्ठ’ खोल्न दोहामा पहिलो बैठक आयोजना गरेका हुन्।

अगस्टको मध्यतिर अमेरिका अफगानिस्तानबाट फर्केपछि दुई पक्षबीचको यो पहिलो इन–पर्सन बैठक हो । तालिबानका कार्यबाहक विदेशमन्त्री मुट्टाकीले अन्तर्राष्ट्रिय समुदायसँग आवद्ध हुन चाहेको एवं एक देशको पक्षमा र अर्को देशको विपक्षमा नरहने बताए ।

“समान आधारमा एक–अर्कासँग राम्रो सकारात्मक सम्बन्ध स्थापित गर्नुपर्ने आवश्यकतालाई छलफलमा जोड दिन थालिएको छ । हामीले अफगानिस्तानले सामना गरिरहेको कठिन परिस्थितिको कारण अफगान वित्तीय सम्पत्तिको निःसर्त प्रवाह हुनुपर्ने आवश्यकतामा जोड दियौँ,” मुट्टाकीले भने, “हामीले अमेरिकी अधिकारीहरूलाई अस्थिर अफगानिस्तानबाट कसैले पनि लाभ उठाउन सक्दैन भनेर स्पष्टसँग बतायौं। त्यसैले कसैले पनि अफगानिस्तानको वर्तमान सरकारलाई कमजोर बनाउने वा आर्थिक तवरमा संघर्ष गरिरहेका हाम्रा अफगान जनताका लागि समस्याहरूलाई बढाउने प्रयास गर्नु नहुने कुरा हामीले वार्तामा राख्यौँ।”

हालै मात्र अन्तर्राष्ट्रिय मुद्रा कोष (आइएमएफ)ले मुलुकमा बढ्दो अनिश्चितताबीच अफगानिस्तानको रकम होल्ड गरेको थियो। आइएमएफले हालै सदस्य राष्ट्रहरूका लागि ६५० अर्ब अमेरिकी डलर विशेष रेखाचित्र अधिकार (एसडिआर) बाँडफाँडको घोषणा गरेपछि यी घटनाहरू भएका हुन् । रासस