जम्बो कमिटीको अभ्यासमा नेकपा एस 

१८ जनाको पदाधिकारी २२ जनामा विस्तारित, एमालेको तुलनामा दोब्बर केन्द्रीय सदस्य बनाउने तयारी 

एमाले विभाजनबाट बनेको नेपाल कम्युनिस्ट पार्टी एकीकृत समाजवादीले ‘जम्बो’ कमिटीको अभ्यास अगाडि बढाएको छ । वरिष्ठ नेतासहित १८ जना पदाधिकारी बनाएको नेकपा एसले बिहीबार चारजना पदाधिकारी थप गरेको छ । 

सचिव जगन्नाथ खतिवडा उपमहासचिव बनेका छन् भने गरिमा शाह, जीवनराम श्रेष्ठ र भागवत विश्वासी सचिवमा मनोनयन भएका छन् । यससँगै नेकपा एसमा अध्यक्ष, दुई वरिष्ठ नेता, सात उपाध्यक्ष, महासचिव, चार उपमहासचिव र सात सचिवसहित २२ जना पदाधिकारी पुगेका छन् । 

यसअघि ७ असोजमा वरिष्ठ नेतामा झलनाथ खनाल र मुकुन्द न्यौपाने, सात उपाध्यक्षमा राजेन्द्र पाण्डे, प्रमेश हमाल, घनेन्द्र बस्नेत, केदार न्यौपाने, केशवलाल श्रेष्ठ, धर्मनाथप्रसाद साह र जयन्ती राई चयन भएका थिए ।

त्यस्तै, महासचिवमा बेदुराम भुसाल र उपमहासचिवमा प्रकाश ज्वाला, गंगालाल तुलाधार र विजय पौडेल, सचिवहरूमा नागेन्द्रप्रसाद चौधरी, जगन्नाथ खतिवडा, राजेन्द्रकुमार राई र रामकुमारी झाँक्री चयन भएका थिए । नेकपा एसमा ३५ सदस्यीय स्थायी समिति, ७१ सदस्यीय पोलिटब्युरो बनेको छ भने सात सय १ सदस्यीय केन्द्रीय परिषद् बनाउने तयारी छ । 

तत्कालीन एमालेमा पोलिटब्युरो सदस्य रहेका सबै नेतालाई स्थायी समिति र केन्द्रीय सदस्य भइसकेकालाई पोलिटब्युरो सदस्य बनाउने नीतिगत निर्णय एसले गरिसकेको छ ।

बिहीबार बसेको एसको स्थायी समिति बैठकले केन्द्रीय कमिटीको संख्या पनि करिब टुंगो लगाइसकेको उपमहासचिव तथा प्रवक्ता जगन्नाथ खतिवडाले बताए । नेकपा एसले तीन सय एक सदस्यीय केन्द्रीय कमिटी बनाउँदै छ । तत्कालीन एमालेको नवौँ महाधिवेशनबाट निर्वाचित एक सय ५९ सदस्यीय केन्द्रीय कमिटीको तुलनामा एसले दोब्बर सदस्य रहेको केन्द्रीय कमिटी बनाउन लागेको हो । एमालेले दशौँ महाधिवेशनमा पनि एसको भन्दा ७६ जना कम अर्थात् दुई सय २५ सदस्यीय केन्द्रीय कमिटी बनाउने गरी विधान पारित गरेको छ ।

‘तीन सय एक सदस्यीय केन्द्रीय कमिटी सदस्यको नाम टुंगो लागिसकेको छ, केही प्राविधिक पक्ष मिलाएर शनिबारसम्म नाम सार्वजनिक गर्नेछौँ,’ खतिवडाले भने, ‘त्यसका लागि केन्द्रीय सचिवालयले शुक्रबार नामका विषयमा गृहकार्य गरेर टुंगो गर्नेछ ।’

त्यस्तै, नेकपा एसको स्थायी समिति बैठकले केन्द्रीय आयोगहरू अध्यक्ष, उपाध्यक्ष र सचिवसहित ३५ सदस्यीय, केन्द्रीय विभागहरू २५ सदस्यीय, स्थानीय कमिटीहरूमा ६ जनाको पदाधिकारी तथा जिल्ला कमिटीको आधारभूत संख्या एक सय एक सदस्यीय बनाउने टुंगो लगाएको छ । बैठकले विजय गुरुङको नेतृत्वमा केन्द्रीय सम्पर्क समन्वय कमिटी गठनका लागि प्रस्ताव गरेको छ । बैठकले केन्द्रीय कार्यालय र केन्द्रीय सचिवालय गठन गरेको छ ।

महासचिव बेदुराम भुसाल नेतृत्वमा गठित केन्द्रीय कार्यालयमा उपमहासचिवहरू प्रकाश ज्वाला, विजय पौडेल, गंगालाल तुलाधर र जगन्नाथ खतिवडा रहेका छन् । त्यस्तै, महासचिव भुसालकै नेतृत्वमा सचिव र उपमहासचिवहरू रहेको ११ सदस्यीय केन्द्रीय सचिवालय पनि गठन गरिएको जनाइएको छ । सचिवालयलाई स्थायी समिति बैठक नबसेको वेला निर्णय गर्ने अधिकार दिइएको छ । पार्टीको चुनाव चिह्न कलम राख्ने कुराका लागि पहल गर्ने निर्णय गरेको छ ।

जोशी एसमा प्रवेश 
एमाले केन्द्रीय सदस्य भानुभक्त जोशी बिहीबार नेकपा एसमा प्रवेश गरेका छन् । बानेश्वरस्थित अर्पण पार्टी प्यालेसमा बसेको स्थायी समिति बैठकमा एसका अध्यक्ष माधवकुमार नेपालले जोशीलाई पार्टी प्रवेश गराए । नेकपा हुँदा सुदूरपश्चिम प्रदेश कमिटीको सहइन्चार्ज जोशी एमाले समानान्तर कमिटीको अध्यक्ष थिए । उनी सुदूरपश्चिम प्रदेशका प्रभावशाली नेता मानिन्छन् । जोशीले एमाले अध्यक्ष केपी ओलीले दशबुँदे सहमति कार्यान्वयन नगरेका कारण नेकपा एसमा प्रवेश गरेको बताए ।