स्वास्थ्य तथा जनसंख्या मन्त्रालयले विद्यालय सञ्चालकहरूलाई विद्यालय खोल्न तयारी भएर बस्न भनेको छ । स्वास्थ्य राज्यमन्त्री उमेश श्रेष्ठको नेतृत्वमा बुधबार बसेको बैठकले कोभिड– १९ सम्बन्धी विद्यालय सञ्चालन कार्यढाँचा २०७७ पूर्ण पालना हुनेगरी विद्यालय खोल्न अनुरोध गर्ने निर्णय गरेको हो । 

स्वास्थ्य मन्त्रालयका प्रवक्ता डा.कृष्णप्रसाद पौडेलले सबै ठाउँमा जोखिम नभएको भन्दै अवस्थाको मूल्यांकन गरी विद्यालय खोल्ने विषयमा छलफल भएको जानकारी दिए । उनले विद्यार्थीको परीक्षण, कन्ट्याक्ट ट्रेसिङ पूर्ण व्यवस्था हुने गरी विद्यालय खोल्न सकिने निर्णय भएको बताए । ‘शिक्षा तथा विज्ञान प्रविधि मन्त्रालयले जारी गरेको कोभिडसम्बन्धी विद्यालय सञ्चालन कार्यढाँचाको पूर्ण पालना हुने गरी विद्यालय खोल्न अनुरोध गरेका छौँ,’ पौडेलले भने ।