गृहमन्त्री बालकृष्ण खाणले संसदमा देखिएका समस्या समाधानका लागि वार्तामा आउन प्रमुख प्रतिपक्ष दल एमालेलाई आग्रह गरेका छन् । आइतबार संसदभवन परिसरमा सञ्चारकर्मीहरूसँग कुरा गर्दै उनले संवादमार्फत समस्याको हल खोज्न एमालेलाई आह्वान गरेका हुन् ।
सभामुख अग्निप्रसाद सापकोटाको भूमिकामाथि आपत्ति जनाउँदै एमालेले प्रतिनिधिसभा बैठक आज तेस्रो दिन पनि अवरुद्ध पारेको छ । कांग्रेस नेतासमेत रहेका गृहमन्त्री खाणले संवादको माध्यमबाट समस्या समाधान गर्न सकिने विश्वास व्यक्त गर्दै संसदमा देखिएका समस्या समाधानका लागि सभामुखले सोमबार दिउँसो सर्वदलीय बैठक बोलाएकाे जानकारी दिए । गृहमन्त्री खाणले भोलि बस्ने बैठकले संसदमा देखिएका सबै समस्या समाधान हुने अपेक्षा गरेको बताए ।
‘म आग्रह गर्न चाहन्छु– भएका मतभेदहरूलाई सुल्झाएर जाऔँ । संवाद, छलफल र वार्ताको माध्यमबाट हामीले ठूल्ठूला समस्याहरूलाई सम्बोधन गरेका छौँ । र, अहिले संसदमा देखिएका समस्याहरूलाई पनि सम्बोधन गर्न सकिन्छ भन्ने नै हाम्रो विश्वास हो । आज पनि सभामुखले बोलाउनुभयो र हाम्रो कानुनमन्त्री र प्रतिपक्ष दलका माननीयहरूबीचमा संवाद भयो । तर, सहमति जुट्न सकेको छैन । भोलि पनि सभामुखले सबै दलका नेताहरूलाई बोलाउनुभएको छ । विश्वास गरौँ– भोलि समस्या समाधान हुन्छ,’ उनले भने ।
