- वि.सं २o७८ भदौ ५ शनिबार
सर्लाहीको मलंगवा नगरपालिकाबाट प्रहरीले पेस्तोलसहित एकजनालाई पक्राउ गरेको छ । शनिबार मलंगवा नगरपालिका–११, ठूलो पल्सीबाट स्थानीय ३० वर्षका समसुद्दिन अन्सारीलार्ई प्रहरीले पक्राउ गरेको हो।
बिहान अन्सारी र उनका दाजु ४५ वर्षीय फुलगनी अन्सारीबीच विवाद भएको खबर पाएपछि प्रहरी घटनास्थल पुगेको थियो। झगडा गरिरहेका उनीहरूलाई छुट्याउने क्रममा समसुद्दिनले कम्मरमा भिरेको अवस्थामा एक थान पेस्तोल बरामद भएको प्रहरीले जनाएको छ।
उनको साथबाट पेस्तोलमा लोड भएको एक राउन्ड गोलीसमेत बरामद भएको छ। यस विषयमा थप अनुसन्धान अघि बढाइएको प्रहरीले जनाएको छ।
