- वि.सं २o७८ श्रावण २७ बुधबार
ट्याक्टर दुर्घटनामा परी सिराहामा एक युवकको मृत्यु भएको छ । सिराहाकाे धनगढीमाई नगरपालिका- ७ गागनखोलानजिकै स.१त ५९३५ नम्बरकाे ट्याक्टर बुधबार पल्टिँदा गोलबजार नगरपालिका- १ निपानेका ३० वर्षीय अरुण यादवको मृत्यु भएको प्रहरीले जनाएको हो ।
उक्त ट्याक्टरमा मजदुरको रूपमा काम गर्दै आएका यादवको ट्याक्टर पल्टिँदा किचिएर मृत्यु भएको प्रहरीले जनाएको छ । साउनदेखि भदौ मसान्तसम्म खोला बन्द भएकाले रातिको समयमा गागनखोलाबाट बालुबा चोर्न गएको वेला ट्याक्टर अनियन्त्रित भई पल्टिएको इलाका प्रहरी कार्यालय गोलबजारले जनाएको छ । ट्याक्टरका चालक अर्जुन मुखिया र ट्याक्टरधनी दिनेश यादव दुवैजना फरार रहेको प्रहरीले जनाएको छ ।
ट्याक्टर दुर्घटनामा परेपछि चालक र ट्याक्टरधनी ट्याक्टर छाडेर फरार भएपछि स्थानीयले प्रहरीलाई खबर गरेको थियो । चालक र ट्याक्टरधनीको खोजीसँगै अनुसन्धान भइरहेको प्रहरीले जनाएको छ ।
